მოზაიკა

რობერტო ფონსეკას კონცერტი თბილისში სრული ანშლაგით ჩატარდა

სოსო ლაღიძის სახელობის ხელოვნების საერთაშორისო ფესტივალი “თბილისი რიტმი” 4 მაისს ვირტუოზი კუბელი პიანისტის, რობერტო ფონსეკას კონცერტით გაიხსნა. მან თავის შემოქმედებით ჯგუფთან ერთად ახალი ალბომი “La Gran Diversion” წარადგინა. ღონისძიება კოტე მარჯანიშვილის სახელობის თეატრში კომპანია “თაგის არტის” ორგანიზებით ჩატარდა. მრავალფეროვანი საპრემიერო პროექტი - ეს არის კუბის მძვინვარე 20-იან წლებში ერთგვარი მოგზაურობა, მიპატიჟება ღამის წვეულებაზე, ცეკვებზე, რომლებიც ტრადიციებს, დიდოსტატებისგან მიღებულ განათლებას, გამორჩეულ ნიჭსა და ველურ თანამედროვე ჟღერადობას ოსტატურად აერთიანებს.

ვირტუოზი მუსიკოსების საოცარმა შესრულებამ მაყურებლებით სავსე დარბაზი აღაფრთოვანა და კუბური მუსიკის დაუვიწყარ რიტმებს ცეკვით ააყოლა.

რობერტო ფონსეკა მრავალი საერთაშორისო ნომინაციისა და ჯილდოს მფლობელია. მისი მუსიკა ევროპული, აფრიკული და კარიბის ზღვის კულტურული ტრადიციების უნიკალური ნაზავია. ალბომი - “La Gran Diversión” - პიანისტის გამორჩეული პროექტია, რომელშიც მისი არაერთი ცხოვრებისეული თუ პროფესიული მოგონება გაერთიანდა.

“მოხარულები ვართ, რომ დღეს აქ, თქვენთან ერთად ვართ. ამ საღამოს თქვენთვის ლამაზ სიმღერებს შევასრულებთ და იმედი მაქვს, ყველა ერთად ვისიამოვნებთ ტრადიციული კუბური მუსიკის თანამედროვე ჟღერადობით”, - აღნიშნა კონცერტის მსვლელობისას რობერტო ფონსეკამ და დამსწრე საზოგადოებას ღონისძიებაზე მისვლისათვის მადლობა გადაუხადა.

როგორც კონცერტის დასრულების შემდეგ “თბილისი რიტმის” დამფუძნებელმა და ხელმძღვანელმა, ანი ლაღიძემ ჟურნალისტებთან საუბრისას განაცხადა, ღონისძიება თავისი სიღრმითა და შინაარსით მონუმენტური და შთამბეჭდავი აღმოჩნდა.

“რობერტო ფონსეკას შემოქმედებას 5 წლის განმავლობაში ვეცნობოდი და საქართველოში მის ჩამოყვანას ვგეგმავდი. იგი კუბური მუსიკის განახლების სიმბოლოდ არის მიჩნეული. სამყარო, რაც მან მოგვიტანა, შეუდარებელია. ეს არ ყოფილა ჩვეულებრივი კონცერტი. ეს იყო სევდით, ტრაგიზმით, ნოსტალგიით, სიყვარულით, სითბოთი დატვირთული საღამო, მელოდიებისა და მაგიების სამყარო. აქ თითოეულმა ყველაფერი ბოლომდე შევიგრძენით”, - აღნიშნა ანი ლაღიძემ.

ფესტივალ “თბილისი რიტმის” მომდევნო ღონისძიება 15 ივნისს გაიმართება. ამ დღეს თბილისს მსოფლიო ბალეტის ვარსკვლავი, ლონდონის სამეფო ბალეტის პრიმა-ბალერინა ნატალია ოსიპოვა პირველად ესტუმრება. იგი მაყურებლის წინაშე ახალი საცეკვაო პროგრამით - „ბუნების ძალა“ (Force of Nature) - წარდგება. წარმოდგენა, რომელიც ალექსანდრე გრიბოედოვის თეატრში გაიმართება, ნატალია ოსიპოვასა და ჯეისონ კიტელბერგერის ერთობლივ ნამუშევრებს, ასევე ბრიტანელი და ამერიკელი ქორეოგრაფების მიერ დადგმულ ცეკვებს აერთიანებს.

9 სექტემბერს კი ფესტივალ „თბილისი რიტმს“ ასევე ალექსანდრე გრიბოედოვის თეატრში სახელგანთქმული ფრანგი აკორდეონისტი, ასტორ პიაცოლას მუსიკის შეუდარებელი ინტერპრეტატორი რიშარ გალიანო ტრიოსთან ერთად ეწვევა. იგი ახალ ალბომს - „ნიუ ვიაჯიო“ (New Viaggio) - წარადგენს.