ეკონომიკა

საგარეო სავაჭრო ბრუნვა 12.7%-ით გაიზარდა - საქსტატის წინასწარი მონაცემები

2017 წლის იანვარ-ოქტომბერში საქონლით საგარეო სავაჭო ბრუნვამ (არადეკლარირებული ვაჭრობის გარეშე) წინა წლის შესაბამის პერიოდთან შედარებით 12.7%-ით მეტია და 8566.1 მლნ. აშშ დოლარი შეადგინა. აქედან ექსპორტზე მოდის 2203.1 მლნ. აშშ დოლარი (წინა წლის პერიოდთან აღნიშნული მაჩვენებელი 29.4%-ითაა გაზრდილი), ხოლო იმპორტზე - 6363.0 მლნ. აშშ დოლარი (7.8%-ითაა გაზრდილი). 2017 წლის იანვარ-ოქტომბერში უარყოფითმა სავაჭრო ბალანსმა 4160.0 მლნ. აშშ დოლარი შეადგინა, რაც საგარეო სავაჭრო ბრუნვის 48.6%-ია. ექსპორტმა რეექსპორტის გარეშე 1700.6 მლნ. აშშ დოლარი შეადგინა, რაც 27.6 %-ით აღემატება წინა წლის შესაბამისი პერიოდის მაჩვენებელს.

2016 წის შესაბამის პერიოდთან შედარებით 4.2%-ით გაიზარდა საგარეო სავაჭრო ბრუნვამ ევროკავშირის ქვეყნებთან და მან 2324.2 მლნ. აშშ დოლარი შეადგინა. აქედან ექსპორტზე 531.1 მლნ. აშშ დოლარი მოდის (რაც 17.1%-ით მეტია), ხოლო იმპორტზე - 1793.2 მლნ. აშშ დოლარი (გაიზარდა 0.9%-ით). ევროკავშირის ქვეყნების წილმა საქართველოს საგარეო სავაჭრო ბრუნვაში 27.1% შეადგინა, რაც 2.2%-ით ნაკლებია წინა წელთან შედარებით. აქედან ექსპორტზე მოდის 24.1% (წინა წელს მოდიოდა 26.7%), ხოლო იმპორტზე 28.2% (წინა წელს ეს მაჩვენებელი 30.1%-ს შეადგენდა). ევროკავშირის ქვეყნებზე მოდის სავაჭრო დეფიციტის 30.3% (2016 წლის იანვარ-ოქტომბერში ეს მაჩვენებელი 31.5%-ს შეადგენდა).

დსთ-ის ქვეყებთან საგარეო სავაჭრო ბრუნვამ წინა წელთან შედარებვით 32.1%-ით გაიზარდა და 2783.9 მლნ. აშშ დოლარი შეადგინა. აქედან ექსპორტზე მოდის 911.5 მლნ. აშშ დოლარი (59.6 %-ით მეტი), ხოლო იმპორტზე - 1872.4 მლნ. აშშ დოლარი (21.9 %-ით მეტი). ამ ქვეყნების წილი საგარეო სავაჭრო ბრუნვაში 32.5%-ია, რაც წინა წლის შესაბამის პერიოდთან შედარებით 4.8%-ით მეტია. აქედან ექსპორტზე მოდის 41.4 % (წინა წელს - 33.5%), ხოლო იმპორტზე 29.4% (26% იყო წინა წელს). 2017 წლის იანვარ-ოქტომბერში დსთ-ის ქვეყნებზე მოდიოდა სავაჭრო დეფიციტის 23.1 % (2016 წლის იანვარ-ოქტომბერში 23.%).

2017 წლის იანვარ-ოქტომბერში ათი უმსხვილესი სავაჭრო პარტნიორი ქვეყნის წილმა საქართველოს მთლიან საგარეო სავაჭრო ბრუნვაში 66.1% შეადგინა. უმსხვილესი სავაჭრო პარტნიორების სამეულში შედიან თურქეთი (1280.1 მლნ. აშშ დოლარი), რუსეთი (929.6 მლნ. აშშ დოლარი) და ჩინეთი (728.0 მლნ. აშშ დოლარი).

2017 წლის იანვარ-ოქტომბერში, სასაქონლო ჯგუფებიდან, საექსპორტო ათეულში პირველი ადგილი სპილენძის მადნებმა და კონცენტრატებმა დაიკავა, 352.5 მლნ. აშშ დოლარი და მთელი ექსპორტის 16% შეადგინა. ფეროშენადნობების ექსპორტი 255.1 მლნ. აშშ დოლარს და შესაბამისად, მთლიანი ექსპორტის 11.6 %-ს უდრიდა. მესამე ადგილზე მსუბუქი ავტომობილების ჯგუფი იმყოფებოდა. ამ სასაქონლო ჯგუფის ექსპორტმა 173.9 მლნ. აშშ დოლარი და მთელი ექსპორტის 7.9 % შეადგინა.

უმსხვილესი საიმპორტო სასაქონლო ჯგუფი 2017 წლის იანვარ-ოქტომბერში ნავთობი და ნავთობპროდუქტები იყო, რომლის იმპორტმა 555.6 მლნ. აშშ დოლარი და მთელი იმპორტის 8.7 % შეადგინა. მეორე ადგილზე იმყოფებოდა მსუბუქი ავტომობილების სასაქონლო ჯგუფი 376.3 მლნ. აშშ დოლარით, რაც იმპორტის 5.9% იყო. მესამე ადგილზე სამკურნალო საშუალებების სასაქონლო ჯგუფი დაფიქსირდა 278.5 მლნ. აშშ დოლარით (იმპორტის 4.4 %).