მოზაიკა

თბილისში ლეგენდარული „SNAP-ის“ კონცერტი გაიმართა

საქართველოში ლეგენდარული მუსიკალური ჯგუფის - „SNAP-ის“ პირველი კონცერტი გაიმართა. ღონისძიება საქართველოს კულტურის ცენტრის შვილობილი კომპანიის - „Blue Horses-ის“ ორგანიზებით „რესპუბლიკა ივენთ ჰოლში“ მოეწყო.

„SNAP” არის ევროდანსის ერთ-ერთი წამყვანი ჯგუფი, რომელმაც 90-იანი წლების საცეკვაო მუსიკას ახალი ენერგია შესძინა და პოპულარობას დღემდე ინარჩუნებს.

როგორც „მედიანიუსს“ Blue Horses-ის“ მენეჯერმა თორნიკე ქურდაძემ განუცხადა, საქართველოში მათ მოსაწვევად მოლაპარაკებები 2 თვემდე გრძელდებოდა.

„ჩვენი კომპანია ცნობილ მუსიკოსებსა და ჯგუფებს აუდიტორიის მოთხოვნებიდან გამომდინარე არჩევს. ამ ეტაპზე, ძირითადად, დისკო- და ელექტრონული მუსიკის პოპულარულ წარმომადგენლებს ვიწვევთ. თუმცა სამომავლოდ ჟანრების გაფართოებასაც ვაპირებთ. ჩვენი მოწვევით, საქართველოში უკვე იმყოფებოდნენ ისეთი სახელოვანი შემსრულებლები, როგორებიც არიან: დიჯეი დასთიქიდი, თენ ველსი, ფედერი, როუთი 94 და სხვები“, - აღნიშნა თორნიკე ქურდაძემ.

მისივე თქმით, კომპანიის მიზანია, საქართველოს პოპულარიზაცია დ მუსიკის მეშვეობით, სხვადასხვა თაობის მსმენელების გაერთიანება.

„SNAP-ის“ კონცერტმა სრული ანშლაგით ჩაიარა. სტუმრებმა ქართველი მსმენელისათვის სხვა დაუვიწყარ ჰიტებთან ერთად, „The Power” და “Rhythm is a Dancer“ ააჟღერეს, რომელთაც საცეკვაო მუსიკის ისტორიაში განსაკუთრებული ადგილი დაიმკვიდრეს. აღსანიშნავია, რომ ჯგუფის მელოდიები და ძლიერი ვოკალი ელექტრონული მუსიკის სცენას დღემდე ასაზრდოებს და ფილმებსა და რეკლამებშიც აქტიურად გამოიყენება.

თბილისში ყოფნისას SNAP-ის წევრები საქართველოს ისტორიას, ბუნებასა და კულინარიასაც გაეცნენ. თორნიკე ქურდაძის თქმით, „ისინი გაოცებულები დარჩნენ, ამ პატარა ერს ასეთი დიდი ისტორია როგორ გაქვთო“.

მუსიკალური ჯგუფი ჩვენს ქვეყანაში სტუმრობას სამომავლოდაც განიხილავს.