მოზაიკა

თბილისში მაქსიმ მრვიცას მეორე კონცერტი გაიმართა

თბილისში ვირტუოზი ხორვატი პიანისტის, მაქსიმ მრვიცას მეორე კონცერტი გაიმართა. ღონისძიების ორგანიზატორები იყვნენ: “Sparks” და “Culture Forever”. სახელოვანი მუსიკოსი საქართველოს მსოფლიო ტურნეს ფარგლებში ეწვია. ფილარმონიის დიდ საკონცერტო დარბაზში შეკრებილი აუდიტორიის წინაშე იგი სრულიად ახალი საკონცერტო პროგრამით --“MAKSIM - Segmenti” - წარდგა.

კონცერტამდე ერთი დღით ადრე კი მან მცხეთის ისტორიული ღირსშესანიშნაობები დაათვალიერა. როგორც მაქსიმ მრვიცამ თქვა, საქართველოში მეორედ ჩამოსვლით ბედნიერი დარჩა. ხაზგასმით აღნიშნა ისიც, რომ ქართველ მაყურებელთან შეხვედრას მოუთმენლად ელოდა.

“ჩემი ახალი ალბომი სხვადასხვა მუსიკალური სტილის ნაზავია. არის ორიგინალური სიმღერები, პოპი, როკი, ძალიან ცნობილი მელოდიები, რომლებსაც საორკესტრო ვერსიით ვასრულებ. მასში ასევე შედის კლასიკური ნაწარმოებები, როგორებიცაა, მაგალითად, პროკოფიევისა და ჩაიკოვსკის ბალეტები. კონცერტზე 8-დან 7 კომპოზიციას შევასრულებ. ასე რომ, მაყურებელი თითქმის მთელ ახალ ალბომს მოისმენს”, - განაცხადა მაქსიმ მრვიცამ ქართული ტელეარხებისათვის კონცერტის დაწყებამდე მიცემულ ინტერვიუში.

მეორე თბილისურ კონცერტზე მაქსიმ მრვიცამ სხვა კომპოზიციებთან ერთად, ჩვეული ოსტატობით ააჟღერა ლეგენდარული ბრიტანული როკ-ჯგუფის - “QUEEN-ის“ ცნობილი სიმღერის - „The Show Must Go On-ისა” და შვედური პოპ-ჯგუფის „Abba-ს” სიმღერის - „Dancing Queen-ის” ჰანგები, ასევე შოპენის ერთ-ერთი პრელუდია და მისი შემოქმედების ერთგვარ სავიზიტო ბარათად ქცეული კომპოზიცია “Pirates of the Caribbean”. პიანისტი ფილარმონიის სტუმართა მხურვალე აპლოდისმენტებით დაჯილდოვდა.

მაქსიმ მრვიცა კლასიკური კროსოვერის ერთ-ერთი ყველაზე წარმატებული შემსრულებელია მსოფლიოში, რომელიც მუსიკალურ ჟანრებს შორის საზღვრებს არღვევს - კლასიკური და კინო-მუსიკიდან პოპ- და ელექტრონულ მუსიკამდე. შესაბამისად, მისი აუდიტორია არა მხოლოდ კლასიკური მუსიკის მოყვარულთ აერთიანებს, არამედ მრავალფეროვანია.

იგი ასრულებს კომპოზიციებს ფილმებიდან” "კელას გაფრენა", "ნოსტრადამუსი", "დედოფლის ბოჰემური რაფსოდია", "ხორვატული რააფსოდია", "სამეფო თამაშები“, „მისია შეუსრულებელია“ და „კარიბის ზღვის მეკობრეები“.

“მუსიკა შეიძლება გახდეს გაქცევა მკაცრი რეალობისგან, როგორც ეს იყო ჩემს შემთხვევაში”, - აცხადებს მაქსიმ მრვიცა.

საქართველოში პირველი კონცერტი მაქსიმ მრვიცამ თავის შემოქმდებითი ჯგუფთან ერთად 2023 წლის 26 ოქტომბერს თბილისის დიდ საკონცერტო დარბაზში გამართა. ხორვატი პიანისტი ქართველი მაყურებლის წინაშე პროგრამით “MAKSIM – The Collection” წარდგა და მისი არნახული მოწონება დაიმსახურა.