პოლიტიკა

საქმის გამოძიების ნაცვლად ყველანაირ მტკიცებულებას, სავარაუდოდ, ანადგურებენ - თინათინ ბოკუჩავა შსს-ზე

„ძალოვნები მთლიანად არიან გასული საპარლამენტო კონტროლიდან“, - განაცხადა „ერთიანი ნაციონალური მოძრაობის“ წევრმა თინათინ ბოკუჩავამ.

მისი თქმით, ნუცუბიძის პლატოზე მომხდარი შემთხვევა არაა ერთადერთი, რომელშიც შსს თავისი თანამშრომლების დანაშაულის დასაფარავად ვიდეოჩანაწერებს ანადგურებს.

„სამწუხაროდ, ეს არ არის პირველი შემთხვევა [ნუცუბიძის პლატოზე მომხდარი ინციდენტი], როდესაც პოლიციელების შესაძლო დანაშაული იკვეთება და ნაცვლად იმისა, რომ საქმე იყოს გამოძიებული, ყველანაირი მტკიცებულება, სავარაუდოდ, ნადგურდება.

ამ შემთხვევაზე უნდა ყოფილიყო მინიმუმ სამი შემთხვევა, რომელსაც უნდა ჩაეწერა იქ განვითარებული მოვლენები და აღმოჩნდა, რომ ორმა არ იმუშავა, ერთმა ფრაგმენტულად იმუშავა, ჩაირთო , გამოირთო და რეალურად ეს ძალიან ჰგავს დანაშაულის დამალვის მცდელობას.

უკვე ძალიან სისტემური სახე მიიღო ასეთმა ქმედებებმა შსს-ის მხრიდან. მაგალითად აფგან მუხტარლის საქმეზე, სადაც დაახლოებით 100-მდე კამერას უნდა ემუშავა და ერთი კამერის ჩანაწერი გაასაჯაროეს მხოლოდ, ასეთი მაღალი საზოგადოებრივი ინტერესის საქმეზე, ელისო კილაძის შვილის შესაძლო ფიზიკური ძალადობის პოლიციის ეზოში, ეროსი კიწმარიშვილის საქმე, სადაც ასევე განადგურებულია ვიდეოჩანაწერები, ასევე ვანო მერაბიშვილის გაყვანის საქმე და მრავალი სხვა, სადაც რეალურად ნადგურდება ვიდეოჩანაწერები სავარაუდოდ დანაშაულის დაფარვის მცდელობის გამო, თუმცა მე დარწმუნებული ვარ, რომ საბოლოო ჯამში მაინც მოუწევს პასუხების გაცემა ქართულ ოცნებას და მაინც მოუწევს პასუხისმგებლობის აღება ამ საქმეზე.

ჩვენ ვითხოვთ მინისტრი მღებრიშვილის გადადგომას, ასევე ვიბარებთ მას პარლამენტში, რომ მინიმუმ, კითხვებს გასცეს პასუხი. მას შემდეგ, რაც ჩვენ უკვე თვეებია ვითხოვთ მის გამოცხადებას პარლამენტში, იქნება ეს ფრაქციისა თუ პლენარულ სხდომაზე, ის უგულვებელყოფს ჩვენს ამ მოთხოვნას იმიტომ, რომ ძალოვნები მთლიანად არიან გასული საპარლამენტო კონტროლიდან.

ეს ხდება იმიტომ, რომ პარლამენტიც ძალიან სუსტია და მხოლოდ და მხოლოდ პოლიტიკური დაკვეთების შემსრულებელი საკანონმდებლო ორგანო გვყავს , შესაბამისად ვერ ახერხებს თავისი კონსტიტუციური ფუნქციების განხორციელებას. ძალოვნებიც იმართებიან არა ქვეყნის ინტერესებიდან გამომდინარე, არამედ ერთი კერძო პირის ინტერესიდან გამომდინარე. სწორედ ამან მიგვიყვანა ასეთ ძალიან სამწუხარო და ჩემი აზრით, ქვეყნისთვის ძალიან სახიფათო რეალობამდე“, - განუცხადა ბოკუჩავამ „პირველ რადიოს“.

ანა მებურიშვილი