რეგიონები

აჭარის ფინანსთა და ეკონომიკის მინისტრი კორუფციულ გარიგებას უარყოფს

აჭარის ფინანსთა და ეკონომიკის მინისტრი რამაზ ბოლქვაძე აჭარის უმაღლესი საბჭოს ფრაქცია „ერთიანი ნაციონალური მოძრაობის“ დეპუტატის, გია აბულაძე განცხადებას გამოეხმაურა. აბულაძემ დღევანდელ ბრიფინგზე ბოლქვაძე კორუფციულ გარიგებაში დაადანაშაულა.

მინისტრმა უპასუხა, რომ რეგიონში პროექტები კანონის დაცვით ხორციელდება, რასაც უწყება ხელს უწყობს.

„მინდა, ხაზგასმით აღვნიშნო, რომ 2014 წელს ორი ინსტანციის ბათუმისა და ქუთაისის სასამართლოს გადაწყვეტილებით დადასტურებული იყო, რომ აღნიშნული ქონება ენვერ ცეცხლაძისთვის არ ჩამოურთმევიათ და შესაბამისად, წარმოადგენდა მის საკუთრებას.

2016 წელს ქუთაისის სააპელაციო სასამართლოში შედგა მხარეთა შორის მორიგება, რის საფუძველზეც ენვერ ცეცხლაძემ უარი თქვა ქონების ნაწილზე, კერძოდ, სახელმწიფოს უსასყიდლოდ გადასცა ახალ ბულვარში მდებარე 4 796 კვ. მიწა და ასევე აიღო ვალდებულება, საკუთარებაში არსებული მიწის საავტომობილო გზის მხარეს მოაწყოს ტროტუარი.

ჩვენთვის უმნიშვნელოვანესია უპირველეს ყოვლისა, კანონის უზენაესობა, რა თქმა უნდა, მეტი ინვესტიციის განხორციელება, ამ გზით ახალი სამუშაო ადგილების შექმნა, რაც ზოგადად რეგიონის განვითარებას უწყობს ხელს“, - განაცხადა ბოლქვაძემ

როგორც გია აბულაძემ განაცხადა, ახალი ბულვარის მიმდებარე ტერიტორია და ბულვარის ნაწილი აჭარის მთავრობამ გავლენიან პირებზე კორუფციული გარიგებით გაასხვისა.

„დოკუმენტში, რომელიც ხელთ მაქვს და აჭარის მთავრობის თავმჯდომარე ხელს აწერს, გრაფაში ნათლად ჩანს, რომ რეგიონის მთავრობა რუსეთის გავლენიან პირებთან კორუფციულ გარიგებაშია. ხელისუფლება კორუფციული გარიგებებით სახელმწიფო საკუთრებას ასხვისებს. ახალი ბულვარის მიმდებარე ტერიტორია და ბულვარის ნაწილი, კერძო პირზე ენვერ ცეცხლაძეზე არის გასხვისებული. დოკუმენტის მიხედვით, თურმე კერძო პირის საკუთრებით მოსახლეობამ უნდა ისარგებლოს. ტერიტორიაზე მრავალსართულიანი შენობა უნდა აშენდეს. აჭარის მთავრობა კი არ არასაჯაროებს, ვინ არის ჩაბაევი, რომელიც მშენებელი კომპანიის „ეიჩ გრუპ კონტრაქშენის“ დამფუძნებელია. ჩვენი ინფორმაციით, სწორედ ამ პიროვნების უკან რუსეთის გავლენიანი პირები არიან, რაც დიდ ეჭვებს აჩენს, რომ ტერიტორია აჭარის მთავრობამ კორუფციული გზით გაასხვისა. მოვუწოდებთ აუდიტის სამსახურს, საკითხით დაინტერესდეს“,- განაცხადა აბულაძემ.