რეგიონები
აჭარის ტურიზმისა და კურორტების დეპარტამენტის ხელმძღვანელი „ნაციონალურ მოძრაობას“ მოსახლეობის შეცდომაში შეყვანაში ადანაშაულებს
აჭარის ტურიზმისა და კურორტების დეპარტამენტის ხელმძღვანელის სულხან ღლონტის განცხადებით, "ერთიანი ნაციონალური მოძრაობის" წევრი ლაშა ადამია მოსახლეობის შეცდომაში შეყვანას მიზანმიმართულად ცდილობს და არაკვალიფიციურ განცხადებას აკეთებს.
ღლონტის განცხადებით, „ნაციონალურ მოძრაობას“ მიეწოდა საჯარო ინფორმაცია, რომელიც ბათუმის საერთაშორისო აეროპორტის, სარფის საბაჟო გამშვები პუნქტის და ბათუმის პორტის საზღვრის კვეთის მონაცემებს ასახავს.მოცემული სტატისტიკის წარმოებაში კი აჭარის ტურიზმისა და კურორტების დეპარტამენტს არათუ 140 000 ლარი, არამედ ერთ თეთრიც არ გადაუხდია.
მისივე თქმით, „ნაციონალური მოძრაობას“ ტერმინებთან დაკავშირებით აქვს პრობლემა, რადგან საუბარია არა ტურისტებზე, არამედ, აჭარის ადმინისტრაციული საზღვრებიდან შემოსულ ვიზიტორებზე. ის აღნიშნავს , რომ 2017 წლის განმავლობაში აჭარის ადმინისტრაციული საზღვრები შინაგან საქმეთა სამინისტროს საინფორმაციო-ანალიტიკური დეპარტამენტის მონაცემების თანახმად, გადმოკვეთა 1 513 533 საერთაშორისო ვიზიტორმა, რაც 6.9% მეტია 2016 წლის ანალოგიურ პერიოდთან შედარებით. 2016 წლის მონაცემების გათვალისწინებით, რეგიონში 2017 წელს ბათუმის საერთაშორისო აეროპორტში, მხოლოდ უცხოელი ვიზიტორების ზრდა 61%-ია.
რაც შეეხება, სხვადასხვა ტიპის კვლევების ჩატარების საკითხს, ტურიზმის დეპარტამენტის ხელმძღვანელი მათ სერვისის გაუმჯობესებისთვის აუცილებელ საშუალებად თვლის.
„ერთიანი ნაციონალური მოძრაობის“ აჭარის ორგანიზაციის წევრმა ლაშა ადამიამ დღეს გამართულ ბრიფინგზე განაცხადა, რომ აჭარის ტურიზმის დეპარტამენტი რეგიონში ჩამოსული ვიზიტორების შესახებ არასწორ სტატისტიკას ავრცელებს და ამისთვის ყოველწლიურად 140 000 ლარს ხარჯავს.
ცირა გურგენიძე