რეგიონები
ჩხოროწყუში ნარკოლოგიურ აღრიცხვაზე მყოფ პირებს ძაღლის და კატის ყოლის უფლება არ აქვთ
ჩხოროწყუს მუნიციპალიტეტის ტერიტორიაზე მცხოვრებ ნარკოლოგიურ აღრიცხვაზე მყოფ პირებს კატებისა და ძაღლების ყოლის უფლება არა აქვთ, 18 წლამდე არასრულწლოვნებს კი მხოლოდ მშობლების წერილობითი თანხმობით შეუძლიათ. ჩხოროწყუს საკრებულოს აღნიშნული დადგენილების შესახებ ინფორმაცია „რეგინფომ“ გაავრცელა.
როგორც „რეგინფო“ წერს, დადგენილება ისეთ რეგულაციებს განსაზღვრავს, რომელთა ნორმატიული მოწესრიგება, როგორც წესი, შეუძლებელია ანდა მიზანშეწონილი არ არის. მაგალითად, დადგენილებაში მითითებულია, რომ: ძაღლისა და კატის მეპატრონე არ შეიძლება იყოს ქმედუუნარო პირი; ფიზიკურ პირებს შეუძლიათ ქუჩიდან აიყვანონ, იჩუქონ, ასევე ანდერძით ან მემკვიდრეობით მიიღონ კატა და ძაღლი; მოდარაჯე ძაღლის დაბმა შეიძლება მხოლოდ 5 მეტრიანი ან უფრო მეტი სიგრძის თასმით; მეპატრონე ვალდებულია უზრუნველყოს კატისა და ძაღლის საძილე ადგილის გათბობა და განათება.
აღნიშნული დადგენილება ჩხოროწყუს ახალი მოწვევის საკრებულომ 2017 წლის 4 დეკემბერს მოქალაქეების მიერ 2017 წლის 5 ოქტომბერს შეტანილი პეტიციის საფუძველზე მიიღო.
საკრებულოს თავმჯდომარის ბესიკ ესაბუას განცხადებით, ეს მათი ინიციატივა არ ყოფილა, პეტიიციით მიმართეს და დადგენილება თუ დისკრიმინაციულ აკრძალვას შეიცავდა, როგორც წესი,საკანონმდებლო მაცნეში გამოქვეყნებამდე უნდა შეემოწმებინათ.
ანალოგიური შინაარსის დადგენილებები 2015 წელს ჩოხატაურის, ბორჯომის, ვანის და წყალტუბოს საკრებულოებმაც მიიღეს და ყველა ეს დადგენილება ამჟამად მოქმედია.
„ადგილობრივი თვითმმართველობის კოდექსის“ თანახმად, შინაური ცხოველების ყოლის წესების დადგენა მუნიციპალიტეტის ორგანოების საკუთარ, ანუ ექსკლუზიურ უფლებამოსილებას წარმოადგენს.
ცირა გურგენიძე