ეკონომიკა

დაგროვებითი პენსიის რეფორმა რეფერენდუმის ჩატარების მოთხოვნას არ ექვემდებარება - ფინანსთა მინისტრის მოადგილე

ფინანსთა მინისტრის მოადგილის, ნიკოლოზ გაგუას განცხადებით, დაგროვებით პენსიის რეფორმას რეფერენდუმი არ სჭირდება, რადგან ის ახალი გადასახადის დაწესებას არ გულისხმობს.

„გადასახადების განმარტება საგადასახადო კოდექსში გვაქვს, რომელიც საერთაშოროსო განმარტებებს ემყარება. კერძოდ, გადასახადი ისაა, რაც სახელმწიფო ბიუჯეტში ზოგადი ხარჯების დასაფინანსებლად მიემართება და ეს კრიტერიუმი ამ შენატანებისთვის არ ვრცელდება. ეს არის თანხა, რომელიც სისტემაში მონაწილე პიროვნების პირად ანგარიშზე მიემართება, რომელიც აღნიშნული პირის პირადი საკუთრება ერთადერთი შეზღუდვითაა, რომ ამ თანხას საპენსიო ასაკის მიღწევის შემდეგ გამოიყენებს, ან განსაკუთრებულ შემთხვევაში. მნიშვნელოვანია, რომ სავალდებულო დაზოგვის ნორმა 40 წლამდე შემოვიღეთ, რაც კლასიკური მეორე პილარია. მნიშვნელოვანია, რომ თანხები იყოს დაზოგილი და საყოველთაო მონაწილეობაც იყოს, რათა სისტემა იაფიანი და მცირეხარჯიანი იყოს. რაც შეეხება რეფერენდუმს, აღნიშნული თემა რეფერენდუმის ჩატარების მოთხოვნას არ ექვემდებარება, რადგან ეს არ არის გადასახადი და გადასახადის არცერთ ფორმულირებაში არ ჯდება“, -უთხრა გაგუამ ჟურნალისტებს.

გაგუას განმარტებით, დაგროვებითი პენსიის წესით 500-ლარიანი ხელფასის შემთხვევაში მოქალაქე 8 ლარს გადაიხდის, ხოლო 2500-ლარიანი ხელფასის შემთხვევასი - 40 ლარს.

დღეს დაგროვებით საპენსიო რეფორმასთან დაკავშირებულ საკანონმდებლო ცვლილებებზე იმსჯელებს იურიდიულ საკითხთა საპარლამენტო კომიტეტი.

საიას განმარტებით, დაგროვებითი პენსიის რეფორმა, კერძოდ, საპენსიო შენატანის სქემა არაკონსტიტუციურია, რადგან საპენსიო შენატანის დაწესებით ხდება „გადასახადის ახალი სახის შემოღება, რაც მხოლოდ რეფერენდუმის გზითაა შესაძლებელი“.

კერძო დაგროვებითი საპენსიო სისტემა უკვე 2018 წლის მესამე კვარტლიდან ამოქმედდება, აღნიშნული კანონპროექტი გულისხმობს შენატანის საპენსიო სქემის შექმნას.

კანონპროექტით დგინდება საპენსიო შენატანების განხორციელების წესი და ოდენობა. პროექტი განსაზღვრავს საჯარო სამართლის იურიდიული პირის - საპენსიო სააგენტოს შექმნასა და მის საქმიანობასთან დაკავშირებულ წესებს, აგრეთვე ეროვნული ბანკის უფლებამოსილებებს. კანონპროექტი აგრეთვე აწესრიგებს დაგროვებითი პენსიის ადმინისტრირებასთან, საპენსიო სქემაში გაწევრიანებასთან, დავების გადაწყვეტილებასთან და აღსრულებასთან დაკავშირებულ საკითხებს.

ანა მებურიშვილი