პოლიტიკა

დღეს გამიზნულად უარს ვამბობთ დისკუსიაზე ხანძართან დაკავშირებით, ამის დრო აუცილებლად მოვა - ელენე ხოშტარია

„ევროპული საქართველოს“ ერთ-ერთი ლიდერის, ელენე ხოშტარიას განცხადებით, პარტია უარს ამბობს ბორჯომის ხეობაში ხანძრის გამომწვევ მიზეზებზე ლაპარაკზე სპეცოპერაციის დასრულებამდე. ამის შესახებ დეპუტატმა პარლამენტის რიგგარეშე სხდომაზე თქვა.

„დიდი მადლობა იმ მეზობელ ქვეყნებს, რომლებიც სტიქიის დროს გვეხმარებიან. რა თქმა უნდა, საზოგადოებაში დაგროვილია გარკვეული კითხვები მიზეზებზე, თავად რეაგირების მექანიზმებზე, მაგრამ ჩვენ დღეს გამიზნულად უარს ვამბობთ, რომ აქ ამაზე მოვაწყოთ დღეს დისკუსია და დავსვათ კითხვები. ამის დრო აუცილებლად მერე მოვა. ამიტომ მხარს ვუჭერთ პრეზიდენტის ბრძანებას“, - თქვა ხოშტარიამ.

შეგახსენებთ, საქართველოს პარლამენტმა ერთხმად (116 ხმით) მხარი დაუჭირა პრეზიდენტის აქტს ბორჯომის ხეობაში საგანგებო სიტუაციაზე რეაგირების მიზნით, საქართველოს სამხედრო ძალების გამოყენების შესახებ.

დღეს პარლამენტის რიგგარეშე სხდომაზე მხოლოდ ეს საკითხი განიხილებოდა. გუშინ საქართველოს პრემიერ-მინისტრმა გიორგი კვირიკაშვილმა საქართველოს პრეზიდენტს, გიორგი მარგველაშვილს ქვეყნის რეგიონებში გაჩენილი ხანძრის ლიკვიდაციის მიზნით, „სამხედრო ძალების გამოყენების წარდგინებით“ მიმართა.

ბორჯომის ხეობაში ხანძარი 20 აგვისტოს გაჩნდა. ამ ეტაპზე ცეცხლი ლოკალიზებულია და დარჩენილია რამდენიმე კერა.

ანა მებურიშვილი