საზოგადოება
გადადგომის მიზეზზე ცოტა ხანში ვისაუბრებ- გიორგი ბარათაშვილი
საზოგადოებრივი მაუწყებლის გენერალურმა დირექტორმა გიორგი ბარათაშვილმა თანამდებობა დატოვა. შესაბამისი განცხადება მან მაწუყებლის კანცელარიაში უკვე შეიტანა.
საზოგადოებრივი მაუწყებლის სამეთვალყურეო საბჭო ახალი გენერალური დირექტორის ასარჩევად შესაბამის პროცედურებს დღეიდან დაიწყებს.
როგორც ბარათაშვილმა მედიასთან საუბარში აღნიშნა, თანამდებობის დატოვების მიზეზებზე იგი სულ მალე ისაუბრებს.
„შევიტანე განცხადება კანცელარიაში და მივმართე ბორდს გადადგომის შესახებ. რა არის ამის მიზეზი? ეს არის სიახლე, ცოტა ხანში ვიტყვი რა სიახლეც იქნება. შესაბამისად, დღეიდან უკვე ვითვლები გადამდგარად. პროცედურა არის შემდეგი, რომ ბორდმა უნდა დანიშნოს მოვალეობის შემსრულებელი დღეს. მერე კანონი ითვალისწინებს 10-დღიან ვადას, რომ მათ უნდა გამოაცხადონ კონკურსი, მერე 30-დღიან ვადას, განცხადების მიღებიდან, შემდეგ 7 დღეში უნდა დანიშნონ ახალი დირექტორი“,-განაცხადა ბარათაშვილმა.
მისი თქმით, მისი მმართველობის პერიოდიდან საზოგადოებრივი მაუწყებელი დღეს ფეხზე დგას.
„მე ვთვლი, რომ ჩვენმა გუნდმა ძალიან წარმატებით გაართვა თავი იმას,რომ ოთხი წლის თავზე, ეს ორგანიზაცია დღეს ფეხზე დგას, და ეს ორგანიზაციია დაინტერესებულია, რომ საინვესტიციო პროექტები გაატაროს“,-აღნიშნა მაუწყებლის ყოფილმა დირექტორმა.
ბარათაშვილი აღნიშნავს, რომ ამ ეტაპზე, მისი გადმოსახედიდან, ტელევიზიაში საქმე გააკეთა.
ამასთან აღნიშნავს, რომ მის გადაწყვეტილებაზე გავლენა არავითარ პოლიტიკურ გავლენებს არ მოუხდენია.
„ვთვლი, რომ ამ გადმოსახედიდან, ჩემი საქმე გავაკეთე. ვთვლი, რომ საზოგადოებრივ მაუწყებელსაც სჭირდება ახალი სისხლი, რომ ყველაფერი გაგრძელდეს უფრო უკეთესად. მე კიდევ ორი წელი მქონდა დარჩენილი. არანაირი პოლიტიკური გავლენა. რაც მე ოთხი წლის განმავლობაში აქ ვარ, ყველამ კარგად იცის, რომ ეს მაუწყებელი პოლიტიკური კონიუნქტურიდან არის თავისუფალი და ამას ამბობს ყველა. შესაბამისად, აქ არაფერი პოლიტიკასთან დაკავშირებული არ არის. ეს ჩემი პირადი გადაწყვეტილებაა, და ეს უკვე უკავშირდება ჩემს მომავალ გეგმებს“,-აღნიშნა ბარათაშვილმა.
მონიკა დავლიანიძე