რეგიონები
გორში შსს 14 წლის წინ გაუჩინარებული მოზარდის ცხედრის სამძებრო სამუშაოებს განაგრძობს
შსს გორში 14 წლის წინ გაუჩინარებული 11 წლის ზაქრო ბერძნიშვილის ცხედრის სამძებრო სამუშაოებს გორის კულტურისა და დასვენების პარკში განაგრძობს.
გორის პარკში სამართალდამცველებმა ორი კარავი გაშალეს. ერთ-ერთ მონაკვეთზე, სადაც მწვანე კარავია გაშლილი, სამართალდამცველების მეთვალყურეობით მიწა გაითხრება. გვერდით მდებარე თეთრ კარავში კი სავარაუდოდ, ექსპერტები იმუშავებენ.
მიმდინარე სამძებრო სამუშაოებთან დაკავშირებით უწყებამ განცხადება გაავრცელა. განცხადებაში ნათქვამია, რომ სამძებრო სამუშაოები 9 წლის გოგონას სასტიკ მკვლელობაში ბრალდებული იაგო ნებიერიძის დამატებითი ჩვენების საფუძველზე დაიწყო. როგორც ცნობილია, იაგო ნებიერიძე 14 წლის წინ 11 წლის მოზარდის გატაცებაშიცაა ეჭვმიტანილი.
„აღნიშნული სამუშაოების ჩატარება ბრალდებულ ი. ნ.-ს მიერ სამართალდამცველებისთვის მიცემული დამატებითი ჩვენების საფუძველზე დაიწყო.
უკვე ჩატარებულია საგამოძიებო ექსპერიმენტი, რა დროსაც ი. ნ.-მ მოზარდის სხეულის სავარაუდო ადგილსამყოფელი მიუთითა. პოლიციამ დაუყოვნებლივ დაიწყო მითითებული ტერიტორიის შემოწმება.
ლევან სამხარაულის სახელობის სასამართლო ექსპერტიზის ბიუროს ტექნიკისა და ექსპერტების დახმარებით, ადგილზე უკვე ჩატარდა გეოსკანირება, რომელმაც პოლიციას დამატებითი ინფორმაცია მისცა ნიადაგზე სხვადასხვა დროს განხორციელებული ზემოქმედების შესახებ. დადგენილია რამდენიმე სავარაუდო ლოკაცია, სადაც ამჟამად მიწის გათხრის სამუშაოები მიმდინარეობს“,-ნათქვამია განცხადებაში.
11 წლის ზაქრო ბერძნიშვილი გორში, 2004 წლის 1-ელ ნოემბერს გაუჩინარდა. ოჯახს უცნობმა პირებმა გამოსასყიდი მოსთხოვეს. გაუჩინარებული ზაქრო ბერძნიშვილის საქმეში ფულის გამოძალვის ბრალდებით იაგო ნებიერიძე იხდიდა სასჯელს.