რეგიონები

„გვაქვს პატარა ბიძინას და ბახტაძის სცენარი ზუგდიდში“ - დაპირისპირება ზუგდიდის საკრებულოში

გუშინ ზუგდიდის მუნიციპალიტეტის საკრებულოს რიგგარეშე სხდომაზე სიტყვიერი დაპირისპირება მოხდა. სხდომაზე მხოლოდ ერთი საკითხი - მერის ლაშა გოგიას გადადგომის შესახებ განცხადების ცნობად მიღება განიხილებოდა.შესახებ „ნიუპოსტი“ იტყობინება.

ოპოზიციის განცხადებით, მას შემდეგ რაც გავრცელდა ჩანაწერი ზუგდიდის მერისა და ვიცე-მერის კორუფციულ გარიგებებში მონაწილეობის შესახებ, თანამდებობიდან უნდა გადადგეს საკრებულოს თავმჯდომარე მამუკა წოწერიაც, რადგან მას ზუგდიდის მერის ყველა გადაწყვეტილება გაჰქონდა საკრებულოზე და უპირობოდ უჭერდა მხარს.

„ქალაქის ყოფილი მერი, რომელსაც ამხელა ჩანაწერები გამოუქვეყნეს და მთელმა საქართველომ ნახა, მაინც დარჩა რაიონული ორგანიზაციის თავმჯდომარედ და დღეს უმრავლესობა პოლიტიკურ პასუხისმგებლობასაც არ იღებს. პასუხისმგებლობა უნდა აიღოს უშუალოდ მამუკა წოწერიამაც, რადგან მან ყველა ეს გადაწყვეტილება გამოიტანა საკრებულოზე და უპირობოდ უჭერდა მხარს.“ - განაცხადა ანა წითლიძემ.

ფრაქცია „ევროპული საქართველოს“ თავმჯდომარე ბათლომე შელიას განცხადებით, უნდაა გადადგეს არა მხოლოდ საკრებულოს თავმჯდომარე, არამედ მთელი გუნდი.

„ნაცვლად იმისა, რომ პასუხისმგებლობა აეღო ქართულ ოცნებას, მივიღეთ პრაქტიკულად ქართული ოცნების გადაჯგუფება სხვადასხვა მხარეს, იმისათვის, რომ მოსახლეობას აუხვიონ თვალი, ვითომ მერი გადადგა, დატოვა მისი მოადგილე, თვითონ პარტიას უხელმძღვანელებს და გვაქვს პატარა ბიძინას და ბახტაძის სცენარი ზუგდიდში. ეს არის უპასუხისმგებლო დამოკიდებულება იმის მიმართ რაც მოხდა და ეს არის საზოგადოების დაცინვა.“ - განაცხადა ბათლომე შელიამ.

საკრებულოს თავმჯდომარე მამუკა წოწერიას განცხადებით კი გამოძიების შედეგების დასრულებამდე ვინმეს მიმართ პასუხისმგებლობის დაკისრებაზე საუბარი ნაადრევია.