პოლიტიკა

მცდელობა, რომ დებატები მხოლოდ 2 კანდიდატს შორის გაიმართოს, არის უპატივცემულობა კონკურენტებისა და მათი ელექტორატის მიმართაც - კახა კუკავა

„თავისუფალი საქართველოს“ თბილისის მერობის კანდიდატის კახა კუკავას განცხადებით, ის მზადაა, მიიღოს მონაწილეობა „ქართული ოცნების“ მიერ შეთავაზებულ საერთო დებატებში. კუკავასთვის გაუგებარია, რატომ სთავაზობს ალეკო ელისაშვილი დებატებს მხოლოდ მმართველი გუნდის კანდიდატს, რადგან მისი აზრით, დებატები უნდა გაიმართოს თბილისის მერობის ყველა კანდიდატს შორის.

„რამდენიმე დღეა თბილისის მერობის ერთ-ერთი კანდიდატი ავრცელებს განცხადებას, რომ დებატები უნდა გაიმართოს მასსა და მმართველი პარტიის კანდიდატს შორის.

ვფიქრობთ, დაუსაბუთებელი და გაუგებარია ამგვარი სურვილი, რადგან, როგორც ქართული კანონმდებლობით, ისე საერთაშორისო პრაქტიკით, დებატები უნდა გაიმართოს ყველა ძირითადი (კვალიფიციური სუბიექტის) კანდიდატის მონაწილეობით.

მე მზად ვარ, მონაწილეობა მივიღო თბილისის მერობის კანდიდატების დებატებში ნებისმიერი ტელევიზიის ეთერში, ყველა კონკურენტთან ერთად. რაც შეეხება მცდელობას, რომ დებატები შედგეს მხოლოდ 2 კანდიდატს შორის, ეს უპატივცემულობაა არა მხოლოდ კონკურენტების, არამედ მათი ელექტორატის მიმართაც.

იმედს გამოვთქვამთ, რომ როგორც „საზოგადოებრივი მაუწყებელი“, ისე კერძო ტელეკომპანიები თბილისის მერობის ყველა კანდიდატს მისცემენ შესაძლებლობას, მონაწილეობა მიიღოს ღია და პარიტეტულ დებატებში“, - ნათქვამია კუკავას განცხადებაში.

აღნიშნული ინიციატივა საპარლამენტო უმრავლესობის ლიდერმა არჩილ თალაკვაძემ კახა კალაძის საარჩევნო შტაბში გამართულ ბრიფინგზე წამოაყენა. დებატებში მონაწილეობაზე თანახმაა „პატრიოტთა ალიანსის“ თბილისის მერობის კანდიდატი ირმა ინაშვილი.

მმართველი გუნდის წინადადებას გამოეხმაურა ალეკო ელისაშვილიც. თბილისის მერობის დამოუკიდებელმა კანდიდატმა შეთავაზებული ფორმატი „აჯაფსანდალი უწოდა“ და განაცხადა, რომ ამით მმართველი პარტია ცდილობს, გაამართლოს კალაძის უარი მის შეთავაზებაზე.

ანა მებურიშვილი