საზოგადოება
მწერალთა სახლში შოთა რუსთაველისა და ვაჟა ფშაველას სახელობის, ასევე, ეროვნული პრემიების კონკურსში გამარჯვებულებს დააჯილდოვებენ
ხვალ, მწერალთა სახლში, შოთა რუსთაველისა და ვაჟა-ფშაველას სახელობის, ასევე, ეროვნული პრემიების კონკურსში გამარჯვებულებს გამოავლენენ და საპატიო ჯილდოებს გადასცემენ.
ქვეყნის გამორჩეულ მოღვაწეებს დამსახურებულ ჯილდოებს პრეზიდენტი გიორგი მარგველაშვილი გადასცემს.
შოთა რუსთაველის სახელობისა და ვაჟა-ფშაველას სახელობის პრემიების, ასევე ეროვნული პრემიების მოპოვებაზე კონკურსი ერთი თვის წინ გამოცხადდა.
კონკურსის პირობების თანახმად, შოთა რუსთაველის სახელობის პრემია მიენიჭება პირს ლიტერატურის, მუსიკის, კინოხელოვნების, თეატრალური ხელოვნების, სახვითი ხელოვნების ან არქიტექტურის დარგში შექმნილი უმნიშვნელოვანესი ნაწარმოებისათვის, რომლის მხატვრულმა ღირსებებმა საერთო ეროვნული აღიარება მოიპოვა და განმსჭვალულია პატრიოტიზმის, თავისუფლებისა და ჰუმანიზმის ზოგადსაკაცობრიო იდეალებით.
შოთა რუსთაველის სახელობის პრემია გაიცემა 3 წელიწადში ერთხელ, არა უმეტეს ხუთისა, თითოეული 10 ათასი ლარის ოდენობით. პირს, რომელიც მოიპოვებს შოთა რუსთაველის სახელობის პრემიას, მიენიჭება შოთა რუსთაველის სახელობის პრემიის ლაურეატის წოდება, გადაეცემა ლაურეატის დიპლომი, სამკერდე ნიშანი და შესაბამისი ფულადი გასაცემელი.
ლიტერატურის დარგში ვაჟა ფშაველას სახელობის პრემია გაიცემა 2 წელიწადში ერთხელ, არა უმეტეს ერთისა, 5 ათასი ლარის ოდენობით. პირს, რომელიც მოიპოვებს ლიტერატურის დარგში ვაჟა-ფშაველას სახელობის პრემიას, მიენიჭება ვაჟა-ფშაველას სახელობის პრემიის ლაურეატის წოდება, გადაეცემა ლაურეატის დიპლომი, სამკერდე ნიშანი და შესაბამისი ფულადი გასაცემელი.
საქართველოს ეროვნული პრემია გაიცემა ყოველწლიურად, თითოეული 10 000 (ათი ათასი) ლარის ოდენობით.