საზოგადოება
მტვრის ყველაზე მაღალი მაჩვენებელი წერეთლის გამზირზეა დაფიქსირებული - თამარ ბაგრატია
გარემოს ეროვნული სააგენტოს ხელმძღვანელის, თამარ ბაგრატიას განცხადებით, დედაქალაქში მტვრის ყველაზე მაღალი მაჩვენებელი წერეთლის გამზირზეა დაფიქსირებული.
როგორც ბაგრატიამ პრესკონფერენციაზე აღნიშნა, თბილისში უკვე ორი თვეა თანამედროვე სტანდარტებით აღჭურვილი სამი სადგური ფუნქციონირებს, რომლის საშუალებით ქალაქში ჰაერის დაბინძურების დონე ისაზღვრება.
„ძალიან დიდი ფინანსური და ადამიანური რესურსი არის მობილიზებული იმისთვის, რომ გარემოს მდგომარეობაზე მონიტორინგი იყოს ძლიერი. ჩვენ გვაქვს სრულიად ახალი მოდერნიზებული ჰაერის სადგური, რომელიც იაპონელების დახმარებით დავამონტაჟეთ. ეს სადგური დამონტაჟებულია დედაქალაქის სამ ადგილას. ესენია - წერეთლის გამზირი, ყაზბეგის გამზირი და ვარკეთილი.
საგულისხმოა, რომ მტვრის ყველაზე მაღალი მაჩვენებელი დაფიქსირებულია წერეთლის გამზირზე. სამწუხაროდ, თბილისის ერთ წერტილში, საკმაოდ მაღალი აზოტის დიოქსიდის დაბინძურება გამოვლინდა. ეს არის მელიქიშვილის გამზირის მიმდებარე ტერიტორიაზე. ასევე ქალაქებიდან ყველაზე მეტად ჰაერი დაბინძურებულია, თბილისის გარდა, ბათუმსა და ქუთაისში“,-განაცხადა თამარ ბაგრატიამ.
მონიკა დავლიანიძე