რეგიონები
”ნაციონალური მოძრაობა“ ქობულეთის გამგეობისგან დასუფთავების სამსახურისთვის საპრემიო ფონდის შექმნას მოითხოვს
ქობულეთში, „ერთიანი ნაციონალური მოძრაობის“ წარმომადგენელი, ბონდო თედორაძე გამგეობას დასუფთავების სამსახურში საპრემიო ფონდის შექმნას სთხოვს.
როგორც თედორაძემ ჟურნალისტებს განუცხადა, დღეს დილით ქობულეთში გამგეობის შენობასთან დასუფთავების თანამშრომლებმა პრემიებისა და უქმე დღეების გამოყოფის მოთხოვნით აქცია გამართეს.
თედორაძის ინფორმაციით, აქციის მონაწილეებს გამგებელი შეხვდა და საკითხის შესწავლას დაპირდა, თუმცა ნაციონალური მოძრაობის წევრი მიიჩნევს, რომ პრობლემის მოგვარება შეუძლებელია, რადგან ბიუჯეტში თანხა გათვალისწინებული არ არის.
„ჩვენი ინფორმაციით, აქციის მონაწილეებს გამგებელი შეხვდათ და დაპირდა, რომ ხვალიდან პრობლემის მოგვარებას შეძლებს. დღეს სანდასუფთავების თანამშრომლები არ მუშაობენ. გამგებელი როგორ აპირებს პრობლემის მოგვარებას საინტერესოა, როცა არსებულ ბიუჯეტში აღნიშნული საკითხი არ არის გათვალისწინებული. მოვითხოვთ, ბიუჯეტში ცვლილებას და ადგილობრივმა მაღალჩინოსნებმა პრემიებსა და დანამატებზე უარი თქვან და სწორედ სანდასუფთავების სამსახურიდან საპრემიო ფონდის განსაზღვრა დაიწყონ, რადგან ეს ხალხი ქალაქის სისუფთავეზე ზრუნავს“, - განაცხადა თევდორაძემ.
ნინო ექვთიმიშვილი