საზოგადოება

ოსი სეპარატისტების ტყვეობიდან გათავისუფლებული ალექსი ადეიშვილი საქართველოს ხელისუფლებას უყურადღებობაში ადანაშაულებს

ოსი სეპარატისტების ტყვეობიდან გათავისუფლებული ალექსი ადეიშვილი საქართველოს ხელისუფლებას უყურადღებობაში ადანაშაულებს.

როგორც სოფელ ოძისში 17 სექტემბერს ე.წ საზღვრის დარღვევისთვის დაკავებულმა ალექსი ადეიშვილმა პრესკონფერენციაზე განაცხადა, საქართველოს ხელისუფლება დაკავებულის მდგომარეობით არ დაინტერესებულა და არც მისი გათავისუფლების მოლაპარაკებების პროცესში ჩართულა.

„ჩვენი მთავრობა მოსახლეობის არანირ გაფრთხილებას არ ახდენს, თუ სად გადის სასაზღვრო ზოლი, სად შეიძლება იყვნენ ისინი, სად არ უნდა გადავიდნენ. იქ მყოფმა სამხედრო ჩინის ოფიცრებმა პირდაპირ მითხრეს, რომ საქართველოს მთავრობა არანაირ ინტერესს არ იჩენს თავისი მოსახლეობის მიმართ, რომლებსაც ჩვენ ვაკავებთო. როდესაც იქ ვიმყოფებოდი არ მინახია „წითელი ჯვრის“ არც ერთი თანამშრომელი, ან ევრომისიის თანამშრომელი, რომელიც რაღაც საშუამავლო ფუნქციას განახორციელებდა დაკავებულებთა მიმართებაში“,-აღნიშნა ადეიშვილმა.

ადეიშვილის განცხადებას სახელმწიფო უსაფრთხოების სამსახურში გამოეხმაურნენ და აღნიშნეს, რომ ალექსი ადეიშვილის დაკავების შესახებ უწყებამ საქმის კურსში ევროკავშირის მონიტორინგის მისია მყისიერად ჩააყენა, რის შედეგადაც, ადეიშვილის გათავისუფლება დაკავებიდან მეორე დღესვე მოხდა.
უწყების ინფორმაციითვე, ადეიშვილს უკანონო ჯარიმის გადახდა დაეკისრა.

მონიკა დავლიანიძე