ეკონომიკა
ქართულ ეკონომიკაში მონოპოლიების განვითარების რისკი არსებობს - მამუკა ბახტაძე
ფინანსთა მინისტრის, მამუკა ბახტაძის განცხადებით, ბიზნესისთვის საწყისი კაპიტალის მოძიება პრობლემას წარმოადგენს, ხოლო საბანკო სესხის მაღალი საპროცენტო განაკვეთი სხვადასხვა ბიზნესსაქმიანობას ამუხრუჭებს. ამის შესახებ მან გადაცემა „იმედის კვირაში“ სტუმრობისას განაცხადა.
„ჩვენი ქვეყნის ეკონომიკის მთავარი რესურსი და მთავარი სიმდიდრე მოქალაქეები არიან, რომლებსაც აქვთ ჯანსაღი, სიცოცხლისუნარიანი, ეკონომიკურად კონკურენტული იდეები და პროექტები. მაგრამ სხვადასხვა ბარიერის გამო ვერ ახორციელებენ მათ. თუ ამას მაკროეკონომიკის გადასახედიდან შევხედავთ, რა თქმა უნდა, მთავარი ბარიერი არის სასტარტო ფულის და კაპიტალის მკვეთრი დეფიციტი. შესაბამისად გვაქვს სიტუაცია, როდესაც მოქალაქეს ბიზნესის დაწყება სურს, და ამის გაკეთება უწევს საკრედიტო რესურსით და იმ მაღალი პროცენტებით, რომლებიც საკრედიტო რესურსს მოჰყვება, რაც ხშირ შემთხვევაში წარმოუდგენელია.
სასტარტო კაპიტალის რეფორმის ამოცანა სწორედ ეს არის, რომ ფინანსური სექტორის ადეკვატური ჩართულობის პარალელურად, ჩვენ შევქმნათ მექანიზმები, მათი ნაწილი უკვე შექმნილია, რომლებიც საშუალებას მოგცემს ჩვენს ეკონომიკაში დამატებითი სიცოცხლე მივცეთ ისეთ პროექტებს, რომლებიც დღეს ვერ ხორციელდება“, - განაცხადა ბახტაძემ.
მინისტრის თქმით, რეფორმა გლობალურია და მოიცავს რამდენიმე პროგრამას, რომელთა მიზნობრივი აუდიტორიაც განსხვავებულია. ბახტაძის თქმით, თითოეულ პროგრამას თავისი ფინანსური მექანიზმი ექნება.
მინისტრმა აღნიშნა, რომ „არასამართლიანი თამაშის წესების“ გამოც მოხდა ინტელექტუალური რესურსის გადინება ქვეყნიდან.
„ესენი იქნებიან ახალგაზრდა სტარტაპერები, მცირე და საშუალო ბიზნესი, რეგიონული განვითარება, სამიზნე ჯგუფი უნდა იყოს ჩვენი ემიგრანტებიც, ვინაიდან ინტელექტის დიდი გადინება მოხდა ქვეყნიდან, რომლის ერთ-ერთი მიზეზიც სწორედ არასამართლიანი თამაშის წესები იყო“, - თქვა ბახტაძემ.
მან აღნიშნა, რომ ქართულ ეკონომიკაში ზოგიერთი ფაქტორის გამო არსებობს მონოპოლიების განვითარების რისკი.
მამუკა ბახტაძემ საქართველოს საბანკო სისტემა გასულ კვირაში გააკრიტიკა. მინისტრმა პრობლემად დაასახელა მაღალპროცენტიანი სესხები, რაც მისი თქმით, მეწარმეობისა და ბიზნესის განვითარებას აფერხებს.