მოზაიკა

რამდენად საშიშია ვარიკოზი?

ვარიკოზი გავრცელებული ვენური დაავადებაა და ის ძირითადად წლების მატებასთან ერთად ქალებში ვლინდება. დიდხანს დგომისა და ჯდომის შემდეგ თუ ფეხების შეშუპება, სიმძიმე და წვის შეგრძნება გაწუხებთ, უნდა გადაამოწმოთ, შესაძლოა,სწორედ ვარიკოზი გქონდეთ. ზედაპირული ვენების გაგანიერება საშიში არ არის და,რა თქმა უნდა, მკურნალობასაც ექვემდებარება. თუმცა, ადამიანს განსაკუთრებულ საფრთხეს უქმნის ღრმა ვენების დაავადებათა მწვავე გართულება - თრომბოზი. ის სიცოცხლისათვის საშიში მდგომარეობაა, რადგან ფილტვის არტერიის თრომბოემბოლიის ძირითად წყაროს წარმოადგენს. ფილტვის არტერიის თრომბოემბოლია კი,თავისმხრივ, გულ-სისხლძარღვთა სისტემის დაავადებებით განპირობებული სიკვდილიანობის მიზეზთა შორის მესამე ადგილზეა. აუცილებელია, რომ იმ სიმპტომების დროს, რომელიც ვარიკოზს ახასიათებს, პაციენტმა სასწრაფოდ გააუმჯობესოს ცხოვრების ხარისხი, შეცვალოს შრომის პირობები და პროფილაქტიკურ ღონისძიებებთან დაკავშირებულ რეკომენდაციებს მიჰყვეს, რაც პროცესის პროგრესირების შესაჩერებლად ელასტიკური კომპრესიული ტრიკოტაჟის გამოყენებას გულისხმობს. ვარიკოზის შესახებ დეტალურ ინფორმაციას შეგიძლიათ Infomedical-ის სამედიცინო პორტალზე გაეცნოთ.

რა იწვევს ვარიკოზს?

ვარიკოზი ქვედა კიდურებში სისხლის უკუდინების დარღვევით მიმდინარე დაავადებაა, რომელიც გამოწვეულია ვენური კედლების დათხელებით, სარქველების ფუნქციის მოშლითა და ვენურ სისტემაში სისხლის შეგუბებით. მისი გამომწვევი სხვადასხვა მიზეზი არსებობს. მათ შორის ყველაზე გავრცელებულია: პასიური, მჯდომარე ცხოვრების რეჟიმი, ჭარბი წონა, ორსულობა-მშობიარობა და ჰორმონული პრეპარატების მიღება. მისი წარმოქმნა ხშირად მემკვიდრეობას უკავშირდება და მშობლიდან შვილზე გადადის. თუმცა, შესაძლებელია, ეს დიდხანს ფეხზე დგომით, ჯდომით და პროფესიული საქმიანობით იყოს გამოწვეული. ვარიკოზს კვანძების წარმოქმნა ახასიათებს. შესაძლოა, ვარიკოზი ადამიანის სხვადასხვა ორგანოზე განვითარდეს, თუმცა ის ყველაზე ხშირად ქვედა კიდურებში ვენების ვარიკოზული გაგანიერებით ვლინდება.