ეკონომიკა
რომან გოცირიძე- დიმიტრი ქუმსიშვილს: გვაძლევთ გარანტიას, რომ ლარი არ ავა 2, 65-ზე მეტად ამ ბიუჯეტით?
ნაციონალური მოძრაობის წევრის რომან გოცირიძის განცხადებით, ბოლო ათი დღის განმავლობაში თურქული ლირა გამყარდა, რუსული რუბლი გამყარდა, და მაშინ რატომ არ იქონია გავლენა ამან ლარის კურსზე.
ამის შესახებ გოცირიძემ პარლამენტში, უმცირესობის სხდომაზე, 2017 წლის სახელმწიფო ბიუჯეტის ფარგლებში ფინანსთა მინისტრისადმი დასმული შეკითხვის დროს განაცხადა.
„თქვენ ისევე როგორც მთავრობის ყველა წევრი იმეორებთ ერთიდაიგივე ლეგენდას, რომ ლარის გაუფასურების მიზეზი, თურმე ყოფილა დოლარის გლობალური გამყარება, ან ჩვენი სავაჭრო პარტნიორი ქვეყნების ვალუტების გამყარება. ამ ბოლო ათი დღის განმავლობაში, თურქული ლირა გამყარდა, რუსული რუბლი გამყარდა. მაგრამ ეს არაფერს ნიშნავს. არავითარი კავშირი, სწრაფი კავშირი მათთან და ლარს შორის არ არსებობს. გადაცემის მექანიზმი ზოგ შემთხვევაში არის თვეები, ზოგ შემთხვევაში წლები. ამიტომ, მორჩით რაა ამ ლეგენდას“,-აღნიშნა გოცირიძემ.
გოცირიძემ ფინანსთა მინისტრს კითხვით მიმართა, რომ აძლევს თუ არა იგი მოსახლეობას იმის გარანტიას, რომ ლარი 2017 წლის ბიუჯეტით 2,65 ლარზე მეტად არ გაუფასურდება?
„ისევ გავიმეორებ ჩემს შეკითხვას. რა იყო ლარის გაუფასურების მიზეზი? რომ იყოს თქვენზე დამოკიდებული არჩევანი, რომელი ჯობია: არ გაზარდოთ 1,3 მილიარდით უსარგებლო ხარჯები რაღაც პროექტებზე და ლარი იყოს მყარი, თუნდაც ერთი დოლარი 2 ლარს უდრიდეს; თუ დააფინანსოთ ის პროექტები, ჩვენი ჯიბიდან, რომელიც შემდგომ ლარის კიდევ უფრო მეტ გაუფასურებას გამოიწვევს. გვაძლევთ თუ არა გარანტიას რომ ლარი არ ავა 2, 65-ზე მეტად. გაჩერდება ლარი 2,65-ზე ამ ბიუჯეტით?“,-განაცხადა გოცირიძემ.
მონიკა დავლიანიძე