ეკონომიკა
საბანკო რეგულაციების ამოქმედება უკვე მეორედ გადავადდა
ახალი საბანკო რეგულაციები, რომლებიც კომერციული ბანკებისთვის ხვალიდან უნდა ამოქმედებულიყო, 1-ელი იანვრისთვის გადავადდა. ამის შესახებ ეროვნულმა ბანკმა განაცხადა.
რეგულაციები, რომლის ამოქმედება ხვალიდან იგეგმებოდა, მხოლოდ საბანკო სექტორს ეხებოდა, მაგრამ გადაწყდა, რომ მომავალი წლიდან შეზღუდვები მთლიან საფინანსო სექტორზე გავრცელდება.
შეზღუდვების ამოქმედება უკვე მეორედ გადავადდა. თავდაპირველად რეგულაციები პირველ ნოემბერს ძალაში უნდა შესულიყო, თუმცა, შემდგომში 2 კვირით გადაიწია.
საბანკო რეგულაციების მიხედვით:
იპოთეკაზე წესდება მაქსიმუმ 15-წლიანი ლიმიტი.
უძრავი ქონებით უზრუნველყოფილი სამომხმარებლო სესხი მაქსიმუმ 10-წლიანი იქნება.
ავტოსესხი მაქსიმუმ 6-წლიანი.
ეროვნული ბანკის პროექტის მიხედვით, განსაზღვრული იყო ექვსი საშემოსავლო საფეხური და სესხის კოეფიციენტი:
თვეში 10 000 ლარზე მეტი – ბანკი თავისი შიდა პოლიტიკის მიხედვით ადგენს სესხსა და პირის შემოსავალს შორის ბალანსს.
თვეში 7 000-10 000 ლარამდე – ყოველთვიური სასესხო ტვირთი შემოსავლის მაქსიმუმ 30 პროცენტი, ანუ 3000 ლარამდე;
თვეში 5 000-7 000 ლარამდე – ყოველთვიური სასესხო ტვირთი შემოსავლის მაქსიმუმ 25 პროცენტი, ანუ 1 750 ლარამდე;
თვეში 3 000-5 000 ლარამდე – ყოველთვიური სასესხო ტვირთი შემოსავლის მაქსიმუმ 20 პროცენტი, ანუ 1000 ლარამდე;
თვეში 1 000-3 000 ლარამდე – ყოველთვიური სასესხო ტვირთი შემოსავლის მაქსიმუმ 20 პროცენტი, ანუ 600 ლარამდე;
თვეში 1 000 ლარამდე – ყოველთვიური სასესხო ტვირთი შემოსავლის მაქსიმუმ 20 პროცენტი, ანუ 200 ლარამდე.
კონკრეტულად რა ცვლილებები განხორციელდება, მოგვიანებით გახდება ცნობილი.
ცნობისთვის, გუშინ კომერციული ბანკების წარმომადგენლები ეროვნულ ბანკთან კონსულტაციებს მართავდნენ. ბანკების წარმომადგენლები იმედს გამოთქვამდნენ, რომ რეგულაციების ამოქმედება 1-ელი იანვრისთვის გადაიწეოდა.