მსოფლიო

საელჩოს იერუსალიმში გადატანით აშშ-ის რეპუტაცია ნულამდე დაეცა - რეჯეფ ტაიფ ერდოღანი

თურქეთის პრეზიდენტის, რეჯეფ ტაიფ ერდოღანის შეფასებით, აშშ-ის საელჩოს იერუსალიმში გადატანით ვაშინგტონის რეპუტაცია ნულამდე დაეცა. ამის შესახებ თურქეთის ლიდერმა TRT World-თან ინტერვიუსას განაცხადა.

„ამერიკის რეპუტაცია თითქმის ნულამდე დაეცა. ამერიკამ და ისრაელმა ისეთი გადაწყვეტილება [საელჩოს გადატანაზეა საუბარი] მიიღეს, რომელსაც არავითარი ღირებულება არ გააჩნია“, -თქვა ერდოღანმა.

თურქეთის პრეზიდენტი ასევე გამოეხმაურა გაეროს კენჭისყრას იერუსალიმის შესახებ აშშ-ის პრეზიდენტის, დონალდ ტრამპის გადაწყვეტილებაზე.

„ამან გვაჩვენა, რომ ეს ქმედებები მსოფლიოსთვის მიუღებელია. თუ ამბობ, რომ „ ფული მაქვს, ძალა მაქვს და შემიძლია თქვენი დაშინება ამის გამოყენებით“, არ უნდა გააკეთო ეს. და სერიოზულად არავინ არ მიიღებს“, - თქვა ერდოღანმა.

ერდოღანის თქმით, იერუსალიმი პალესტინის დედაქალაქია.

„და ახლა გადაიტანეთ თქვენი საელჩო იერუსალიმში. მერე? იერუსალიმი პალესტინის დედაქალაქია და ყველამ იცის ეს. ეჭვიც არაა. აღიარებთ ამას თუ არა, სულერთია“, - თქვა თურქეთის პრეზიდენტმა.

აშშ-ის საელჩო იერუსალიმში ოფიციალურად 14 მაისს გაიხსნა, რაც დაემთხვა ისრაელის სახელმწიფოებრიობის 70-ე წლისთავის აღნიშვნას.

წინა წლის დეკემბერში დონალდ ტრაპმა იერუსალიმი ისრაელის დედაქალაქად აღიარა, რასაც მოჰყვა უკმაყოფილება პალესტინელთა მხრიდან.

იერუსალიმის სტატუსი ერთ-ერთი გამოწვევაა ისრაელ - პალესტინის კონფლიქტში. პალესტინელები მიიჩნევენ, რომ იერუსალიმის აღმოსავლეთი ნაწილი მათი მომავალი სახელმწიფოს დედაქალაქი უნდა გახდეს.