პოლიტიკა
საქართველოს მადლენ ოლბრაიტი ეწვევა
ეროვნულ-დემოკრატიული ინსტიტუტის (NDI) თავმჯდომარე, აშშ-ის ყოფილი სახელმწიფო მდივანი მადლენ ოლბრაიტი, ინსტიტუტის დირექტორთა საბჭოს წევრები საქართველოს ეწვევიან.
როგორც საზოგადოებრივი მაუწყებელი ეროვნულ-დემოკრატიული ინსტიტუტზე (NDI) დაყრდნობით იუწყება, ვიზიტის მიზანია საქართველოში მიმდინარე დემოკრატიული პროცესებისა და საქართველოს სუვერენიტეტის მხარდაჭერა, საქართველოს მიღწევების, მიზნებისა და გამოწვევების შესახებ მეტი ინფორმაციის მიღება, საქართველოში NDI-ის საქმიანობაზე დაკვირვება და საქართველოსა და დასავლეთს შორის ტრანსატლანტიკური ურთიერთობების განმტკიცება.
ინსტიტუტის დირექტორთა საბჭოს წევრები და ორგანიზაციის სხვა მეგობრები საქართველოში 11-დან 15 ივნისამდე დარჩებიან და თბილისს, კახეთსა და გორს ეწვევიან.
დელეგაცია შეხვდება ხელისუფლების წარმომადგენლებს, მათ შორის პრეზიდენტსა და პრემიერ-მინისტრს, პარლამენტის წევრებს, მათ შორის პარლამენტის თავმჯდომარეს, მმართველი და ოპოზიციური პარტიების ლიდერებს, ადგილობრივი თვითმმართველობების წარმომადგენლებსა და მერებს, სამოქალაქო საზოგადოების წარმომადგენლებს, ჟურნალისტებს, ექსპერტებსა და დიპლომატებს.