საზოგადოება

საქართველოს მოქალაქეობა მე კი არა აფგან მუხთარლის უნდა შესთავაზონ - ლეილა მუსტაფაევა

აზერბაიჯანელი ჟურნალისტისა და აქტივისტის, აფგან მუხთარლის მეუღლე ლეილა მუსტაფაევა ძველი თბილისის პოლიციის დეპარტამენტში მივიდა. როგორც მან ჟურნალისტებს განუცხადა, საუბარი, სავარაუდოდ, უსაფრთხოების ზომებს შეეხება.

საქართველოს პრემიერ-მინისტრის, გიორგი კვირიკაშვილის წინადადებას, რომ მუსტაფაევასა და მის შვილებს, გამონაკლისის სახით, პრეზიდენტმა საქართველოს მოქალაქეობა მიანიჭოს, მუსტაფაევამ უპასუხა, რომ მოქალაქეობა მის მეუღლეს უფრო სჭირდება.

„დაკითხვისთვის არ მოვსულვარ. გუშინ დამიკავშირდნენ და მთხოვეს, მოვსულიყავი. მითხრეს, უსაფრთხოების ზომებთან დაკავშირებით იქნება საუბარი. ჩემი მოსვლის მიზანიც ესაა. რაც შეეხება საქართველოს მოქალაქეობას, მე ისევ უარს ვამბობ მის მიღებაზე. აფგან მუხთარლის მდგომარეობა უფრო მნიშვნელოვანია ვიდრე ჩემი უსაფრთხოება ან ჩემი მოქალაქეობა. მე კარგად არ ვიცნობ ქართულ კანონმდებლობას, მაგრამ თუ ჩემი მეუღლის დახმარება სურთ, მოქალაქეობა მას უნდა შესთავაზონ და არა მე“, - განუცხადა ჟურნალისტებს მუსტაფაევამ.

შეგახსენებთ, 3 ივნისს შინაგან საქმეთა სამინისტროში გამართულ შეხვედრაზე უწყების მინისტრის მოადგილემ შალვა ხუციშვილმა მუსტაფაევას სახელმწიფო დაცვის დანიშვნა შესთავაზა.

აზერბაიჯანელი ჟურნალისტი აფგან მუხთარლი 29 მაისს გაუჩინარდა. მომდევნო დღეს კი გავრცელდა ინფორმაცია, რომ ჟურნალისტი ბაქოს სახელმწიფო საზღვრის სამსახურის საგამოძიებო განყოფილებაში იმყოფებოდა. მუხთარლი აზერბაიჯანის საზღვარზე უკანონოდ გადაკვეთისა და დეკლარაციის გარეშე დიდი ოდენობით თანხის გადატანის ბრალდებით დააკავეს.

აზერბაიჯანის გენერალური პროკურატურის განცხადებით, მუხთარლიმ საზღვარი პასპორტის გარეშე გადაკვეთა.

31 მაისს მუხთარლის სასამართლო პროცესი გაიმართა. მას სამთვიანი წინასწარი პატიმრობა შეეფარდა. მას ბრალი წაუყენეს სამი მუხლით: საზღვრის უკანონოდ გადაკვეთა, კონტრაბანდა და სამართალდამცავებისათვის წინააღმდეგობის გაწევა.

საქართველოს შინაგან საქმეთა სამინისტრომ კი აზერბაიჯანელი ჟურნალისტის აფგან მუხტარლის საქმესთან დაკავშირებით საქართველოს შსს-მ გამოძიება დაიწყო საქართველოს სსკ-ის 143-ე მუხლით, რაც თავისუფლების უკანონო აღკვეთას გულისხმობს.

ანა მებურიშვილი