საზოგადოება

საზოგადოებრივი მაუწყებლის დირექტორის თანამდებობაზე განაცხადების მიღება დღეს სრულდება

საზოგადოებრივი მაუყწებლის გენერალური დირექტორის თანამდებობაზე განაცხადების მიღება დღეს 18:30 -ზე სრულდება.

ამ დროისთვის სამეურვეო საბჭოს განაცხადით, 9 პირმა მიმართა: ნინო ზაუტაშვილმა, თიკო ბერძენიშვილმა, ვასილ მაღლაფერიძემ, ბაჩუკი ბახტაძემ, რევაზ შალიბაშვილმა,ზაალ ანჯაფარიძემ, გიორგი ქავთარაძემ, გურამ ფალავანდიშვილმა და ნიკოლოზ მჭედლიშვილმა.

კანონმდებლობის მიხედვით, საზოგადოებრივი მაუწყებლის ახალი გენერალური დირექტორი, სათველყურეო საბჭომ 7 იანვარმდე უნდა აარჩიოს.

თუმცა, მანამდე 31 დეკემბერს გამოქვეყნდება კანდიდატთა საბოლოო სია და უკვე 3 იანვარს, ფარული კენჭისყრის პირველი ტური გაიმართება, რომელზეც სამეთვალყურეო საბჭოს წევრები, ის კანდიდატები უნდა შეარჩიონ, რომლებიც მეორე ტურში გადავლენ.

როგორც მედიასთან საუბარში საზოგადოებრივი მაუწყებლის სამეურვეო საბჭოს თავმჯდომარემ გრიგოლ გოგელიამ განაცხადა, კენჭისყრის მეორე ტური 3-დან 6 იანვრის ჩათვლით გაიმართება.

„მეორე ტურში იქნება ინტერვიუს ნაწილი, რა დროს საბჭო კანდიდატთან გასაუბრებას ახდენს და უკვე 6 იანვარს ჩატარდება კენჭისყრა. იმისთვის,რომ კანდიდატი შეირჩეს, დამსწრეთა უმრავლესობის ხმაა საჭირო. თუ რვავე წევრი იქნება, ესეიგი გადამწყვეტი 5 ხმა აღმოჩნდება“,-განაცხადა გოგელიამ.

სამეურვეო საბჭოს წევრის სულხან სალაძეს განცხადებით, კი მეორე ტურის გასაუბრება მეორე არხის პირდაპირ ეთერში გადაიცემა.

„გასაუბრება მეორე არხის პირდაპირი ეთერით გადაიცემა. გასაუბრების დასრულების შემდეგ, 5 იანვარს დღის მეორე ნახევარში დაგეგმილია შემაჯამებელი გადაცემა მეორე ტურში გასული კანდიდატებისათვის. ამასთან, თავად სხდომები არის ღია და ყველა დაინტერესებულ პირს ექნება საშუალება რომ დაესწროს ამ სხდომებს. ჩვენ ვცდილობთ, რომ მაქსიმალურად ამ პროცესის საჯაროობა იყოს უზრუნველყოფილი“,-აღნიშნა სალაძემ.

მონიკა დავლიანიძე