ეკონომიკა

სესხს მიიღებს ყველა, ვისაც ამის საშუალება ექნება - ფინანსთა მინისტრი

ფინანსთა მინისტრმა ივანე მაჭავარიანმა ახალ საბანკო რეგულაციებთან დაკავშირებით განაცხადა, რომ სესხს მიიღებენ ისინი, ვინც ამისი საშუალება ექნებათ.

მინისტრს ჟურნალისტებმა ბანკების პროგნოზთან დაკავშირებით ჰკითხეს, რომლის თანახმად, ფიზიკურ პირებზე სესხების გაცემის ახალი წესი, რომელიც 1 ნოემბრიდან ამოქმედდება, 3 %-ით შეამცირებს ეკონომიკის ზრდას. მაჭავარიანმა უპასუხა, რომ მხოლოდ 0.6%-ია ნავარაუდევი.

„ჩვენი მოლოდინი იყო, რომ 0,6 პროცენტი ექნება ეკონომიკაზე ნეგატიური გავლენა, ისიც მოკლე ვადაში და ერთ წელიწადში ესეც გასწორდება“, – აღნიშნა მაჭავარიანმა.

მისივე განმარტებით, ნებისმიერ ეკონომიკურ კრიზისს ჭარბვალიანობა იწვევს.

„ნებისმიერი კრიზისი რომ აიღოთ მსოფლიოში, ყოველთვის მის ძირში დევს ჭარბვალიანობა. ეს იწვევს კრიზისს. ამან გამოიწვია 30-იან წლებში ამერიკაში და 2008 წელსაც. ყოველთვის ჭარბვალიანობა დევს ყველა კრიზისის სათავეში. შესაბამისად, აღნიშნულ საკითხს სჭირდებოდა მიხედვა. ეს იყო ტოქსიკური გზა, რეალურად არანაირ შვებას არ აძლევდა ადამიანებს გრძელ ვადაში. სესხს მიიღებს ყველა, ვისაც ამის საშუალება ექნება. ღმერთმა დაიფაროს, რომ საბანკო სექტორი დაზიანდეს“, – განაცხადა ფინანსთა მინისტრმა.

მისი შეფასებით, საბანკო სექტორს საფრთხე არ ემუქრება.

„ამ სექტორს არაფერი არ ემუქრება, არც მის სტაბილურობას. უბრალოდ, ეკონომიკის გაჯანსაღების მიზნით უმნიშვნელო კორექცია ხდება“, – თქვა მაჭავარიანმა.