რეგიონები

შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატმა 26 მაისი მცხეთაში აღნიშნა

“ჩვენი ქვეყნის დამოუკიდებლობას დღეს ყველა ერთად ვზეიმობთ”, - მიმართა ქეთევან ციხელაშვილმა ეთნიკური უმცირესობების წარმომადგენელ ახალგაზრდებს, რომელთა მონაწილეობითაც დამოუკიდებლობის დღისადმი მიძღვნილი ფოლკლორული კონცერტი მცხეთაში გაიმართა.

„ჩვენთვის და ჩემი გუნდისთვის დიდი პატივია, რომ დღევანდელ კონცერტში მონაწილეობენ ჩვენი თანამოქალაქეები საქართველოს სხვადასხვა კუთხეებიდან, აქ წარმოდგენილია ჩვენი სამშობლოს ეთნიკური მრავალფეროვნება და სიმდიდრე. მე ძალიან მახარებს რომ 26 მაისს ჩვენი ქვეყნის დამოუკიდებლობას, დღეს ყველა ერთად ვზეიმობთ. დღევანდელი ზეიმი კი იმით არის აღსანიშნავი და გამორჩეული, რომ ჩვენ ასევე ვზეიმობთ ჩვენი ეროვნული სიამაყის, ვეფხისტყაოსნის ავტორის შოთა რუსთაველის 850-ე წლისთავს.“, - განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა.

სახელმწიფო მინისტრის აპარატის ორგანზებით გამართული კონცერტს კომპოზიტორი მანანა ალფაიძე უძღვებოდა. კონცერტის მიმდინარეობისას ეთნიკური უმცირესობების წარმომადგენელმა ახალგაზრდებმა წაიკითხეს ფრაგმენტები „ვეფხისტყაოსნიდან“ სხვადასხვა ენაზე. მათ ქეთევან ცხიელაშვილმა საჩუქრად „ვეფხსიტყაოსანი“ გადასცა.

„ეს არის მართლაც ჩვენი საერთო სიმდიდრე და ყველა, ვინც დღეს აქ შევიკრიბეთ, სიამაყით ვამბობთ რომ ჩვენ რუსთაველის ქვეყნიდან ვართ. და ის ახალგაზრდები, რომლებიც დღეს ჩვენ სხვადასხვა ენაზე კიტხულობენ ვეფხისტყაოსნის სტრიქონებს, არის ამ ერთიანობის კიდევ ერთი თვალსაჩინო გამოხატულება“, - აღნიშნა ქეთევან ციხელაშვილმა.

შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის ინფორმაციით, დღესვე დასახელდნენ ესეების კონკურსის „ქართული ენა - გზა ჩემი წარმატებისაკენ“ გამარჯვებულები. კონკურსი სახელმწიფო მინისტრის აპარატის ორგანიზებით და საქართველოს გაეროს ასოციაციის ფინანსური მხარდაჭერით გაიმართა. ოთხ გამარჯვებულს ქეთევან ციხელაშვილმა საჩუქრად პლანშეტები და დიპლომები გადასცა.

კონცერტის პარალელურად, ასევე მოეწყო ბავშვებისთვის არტ-სივრცე, პატარებისთვის ჩატარდა ასფალტზე ხატვის კონკურსი, მათ პრიზები გადაეცათ.