პოლიტიკა

წინა ხელისუფლებამ შემოიყვანა ჩატაევი და თანამშრომლობდა მასთან - ირაკლი ჩიმაკაძე

ანტიტერორისტული ცენტრის ხელმძღვანელმა - ირაკლი ჩიმაკაძემ თბილისში, ბერი გაბრიელ სალოსის ქუჩაზე ლიკვიდირებული აჰმედ ჩატაევის საქართველოში შემოსვლასა და მასთან თანამშრომლობაში წინა ხელისუფლება დაადანაშაულა.

ჩიმაკაძის მტკიცებით, ჩატაევის ციხიდან გათავისუფლება „ქართული ოცნების“ მმართველობის დროს იმის გამო მოხდა, რომ წინა ხელისუფლებამ ჩატაევს ბრალი არასწორი მუხლით წარუდგინა.

ჩიმაკაძის განცხადებით, 2017 წელს ჩატაევი საქართველოში არალეგალურად შემოვიდა და ქვეყანაში 20 დღე იმყოფებოდა.

„წინა ხელისუფლება თანამშრომლობდა ჩატაევთან. მაქვს უამრავი ფაქტი. მაგრამ ვერ გავასაჯაროებ. არ ვიცი, ამ თემაზე გამოძიება მიმდინარეობს თუ არა. რატო გაათავისუფლა?-იმიტომ, რომ არასწორი მუხლით იყო დაკავებული.

როგორ შემოვიდა საქართველოში?-ვინ შემოიყვანა?- წინა ხელისუფლებამ. 2010 წელს შემოვიდა პირველად, ბოლოს არალეგალურად შემოვიდა, ჩვენ არ შემოგვიყვანია, ეს დამტკიცებულია, ყველანაირი მტკიცებულება წარვადგინეთ, მათ შორის იმ მოწმეების, ვინც მონაწილეობდა ტრანსპორტირებაში. სულ რაღაც 20 დღე იმყოფებოდა საქართველოში“, - განაცხადა ჩიმაკაძემ და სიცრუე უწოდა ინფორმაციას, რომ ჩატაევის ინტერპოლით ძებნილი თანამზრახველები საქართველოში ორი წლის მანძილზე იმყოფებოდნენ.