ეკონომიკა

თვითდასაქმებულთა წილი დასაქმებულებში 51.7%-ს შეადგენს - საქსტატი

2017 წელს ეკონომიკურად აქტიური და შრომისუნარიანი ასაკის მოსახლეობის (15 წლისა და უფროსი ასაკის მოსახლეობა) წილი 65.8%-ს შეადგენს. ამის შესახებ წერია უმუშევრობისა და დასაქმების შესახებ საქსტატის ახალ კვლევაში.

2016 წელთან შედარებით შემცირებულია როგორც მოსახლეობის აქტიურობის დონე, ისე დასაქმების დონე, შესაბამისად 0.5 და 0.4 პროცენტული პუნქტით. ქალაქის ტიპის დასახლებებში დასაქმების დონე წინა წელთან შედარებით შემცირებულია 1.5 პროცენტული პუნქტით, ხოლო სოფლის ტიპის დასახლებებში აღნიშნული მაჩვენებელი გაზრდილია 0.8 პროცენტული პუნქტით. ანალოგიურად, აქტიურობის დონე წინა წელთან შედარებით ქალაქის ტიპის დასახლებებში შემცირებულია 1.6 პროცენტული პუნქტით, ხოლო სოფლის ტიპის დასახლებებში 0.8 პროცენტული პუნქტით არის გაზრდილი.

კლების ტენდენცია შეინიშნება თვითდასაქმებულთა წილში, რომლებიც დასაქმებულთა უმრავლესობას წარმოადგენენ. 2016 წელთან შედარებით 2017 წელს თვითდასაქმებულთა წილი დასაქმებულებში 1.5 პროცენტული პუნქტითაა შემცირებული და 51.7%-ს შეადგენს.