საზოგადოება
უფასო მედიკამენტების პროგრამასთან დაკავშირებით ჯანდაცვის მინისტრი ფარმაცევტული კომპანიების წარმომადგნლებს ხვდება
უფასო მედიკამენტების პროგრამასთან დაკავშირებით, ჯანდაცვის მინისტრი დავით სერგეენკო 16-მდე ფარმაცევტული კომპანიის წარმომადგენელს დახურულ კარს მიღმა ხვდება.
მედიკამენტებზე ხელმოსაწვდომობის პროგრამის გაფართოებასთან დაკავშირებით, ფარმაცევტული კომპანიების წარმომადგენლები საკუთარ ხედვას წარმოადგენენ. კომპანია პსპ-ს წარმომადგენელმა გიორგი რამიშვილმა აღნიშნა, რომ პროგრამა ოთხი მიმართულებით უნდა განვითარდეს.
"უნდა გაფართოვდეს ბენეფიციართა რაოდენობა, რომლებსაც სიმბოლურ ფასად ექნება წვდომა ესენციურ მედიკამენტებზე. უნდა გაფართოვდეს მედიკამენტების ნუსხა და 23 მედიკამენტიდან მისი რაოდენობა გაიზარდოს 50-მდე. ეს უნდა გაკეთდეს დამტკიცებული ბიუჯეტის პირობებში. უნდა შეიქმნას პირობები, რათა მედიკამენტების ფასმა დაიწიოს არა მხოლოდ პროგრამის ბენეფიციარებისთვის, არამედ ბაზარზეც. ამისთვის შესაძლებელია რამდენიმე მეთოდიკის კომბინაცია",- განაცხადა რამიშვილმა.
დავით სერგეენკოს განცხადებით, არსებობს რესურსი, რომ ერთობლივი თანამშრომლობით, მედიკამენტებზე ხელმისაწვდომობა კიდევ უფრო გაიზარდოს.
"ჩვენ ორი კვირის წინ შევიკრიბეთ და გვქონდა მსჯელობა იმაზე, რომ არსებობს რესურსი, რათა ჩვენ ერთობლივი თანამშრომლობის გაღრმავებით შევძლოთ მოსახლეობისათვის ყველაზე აქტუალურ მედიკამენტებზე ხელმოსაწვდომობის გაზრდა. ჩვენ ამ ორი კვირის განმავლობაში უკვე გვქონდა ინდივიდუალური სამუშაო შეხვედრები, სადაც ადგილობრივ და საერთაშორისო მწარმოებლებთან განვიხილეთ თანამშრომლობის გაღრმავების საკითხები. იყო ძალიან საინტერესო მოსაზრებები და ერთი მხრივ, მზაობა იმისთვის, რომ გარკვეულ მედიკამენტებზე შესაძლებელი ყოფილიყო გარკვეული ფასდაკლებები, მეორე მხრივ კი, რიგმა მწარმოებელმა გამოთქვა სურვილი იმ მედიკამენტებით დახმარებასთან დაკავშირებით, რომლებსაც თვითონ აწარმოებენ, ასევე დიაგნოსტიკაში, ექიმების მომზადებასა თუ გარკვეული ხელსაწყო აპარატების მიწოდებაში, რაც ასევე ძალიან მნიშვნელოვანია“, - განაცხადა სერგეენკომ.
უფასო მედიკამენტების პროგრამა 2017 წლის 1 ივლისიდან ამოქმედდა. 600 000 მოქალაქე, რომელიც სოციალურად დაუცველ პირთა ან ქრონიკულ დაავადებათა მქონე მარტოხელა პენსიონერთა კატეგორიას განეკუთვნება, 23 დასახელების მედიკამენტს ყოველთვიურად, 1 ლარის საფასურად იღებს.
8 თებერვალს ჯანდაცვის მინისტრი მედიკამენტების მწარმოებლებთან, მედიკამენტების ხელმისაწვდომობის გაზრდის მიზნით, პარტნიორობის გაფართოებაზე შეთანხმდა. მაშინ მინისტრმა აღნიშნა, რომ სიახლე მედიკამენტების ჩამონათვალის 23-იდან, სულ მცირე, 50-მდე გაზრდას გულისხმობს.
ცირა გურგენიძე