საზოგადოება

უცხო ქვეყნიდან შემოსულ საეჭვო ზარებს არ უპასუხოთ - მაგთიკომი

კომპანია „მაგთიკომი“ საკუთარ მომხმარებელს აფრთხილებს, რომ უცხო ქვეყნის ნომრებზე შემოსულ ზარებს არ უპასუხოს. „მაგთიკომის“ ინფორმაციით, ბოლო დროს გახშირდა ზარები შემდეგი საერთაშორისო ნომრებიდან:

0067570894048;

0067570894045;

0067570894046

კომპანიის განცხადებით, თუ გამოტოვებულ ზარს ნახავთ, არ გადაურეკოთ, რადგან ამ შემთხვევაში აბონენტს ზარის საფასური ჩამოეჭრება.

„მაგთიკომის“ განცხადებით, მსგავს შემთხვევებზე ის დაუყოვნებლივ რეაგირებას ახდენს:

1. აღნიშნულ ნომრებს ბლოკავს (საერთაშორისო კოდის 00 ან 1010-ის გამოყენებით)

2. აფრთხილებს მომხმარებლებს ოფიციალური ვებ-გვერდისა და სოციალური ქსელების საშუალებით!

ამ კონკრეტულ შემთხვევაშიც, აღნიშნული ნომრები უკვე დაბლოკილი იყო.

ამ თაღლითურ სქემას „ვანგირი ზარებს“ უწოდებენ, რაც იაპონურად ნიშნავს „ერთი ზარი და დაკიდება“-ს. სქემა შემდეგნაირად მუშაობს - ბოროტმოქმედები სპეციალური მოწყობილობის მეშვეობით შემთხვევით შერჩეულ ათასობით ნომერს ირჩევს და ურეკავს. ზარი ნომერთან შედის და მომენტალურად ითიშება. თაღლითების მიზანია, რომ მსხვერპლმა გადაურეკოს და რაც შეიძლება დიდხანს დარჩეს ხაზზე. თუკი აბონენტმა შემოსულ ნომერზე დარეკა, თანხა ჩამოეჭრება.

ანა მებურიშვილი