რეგიონები

ზუგდიდელი გარემოვაჭრეები ქუთაისის პარლამენტთან აქციას გამართავენ

ზუგდიდის გარემოვაჭრეთა ნაწილი ქალაქში გარევაჭრობის აკრძალვას ქუთაისის პარლამენტთან გააპროტესტებს, ისინი უკვე გაემგზავრნენ. გარემოვაჭრეები აპირებენ, სთხოვონ პარლამენტს, დაუშვან გარევაჭრობა იქამდე, სანამ ალტერნატიული ფართები არ მოეწყობა.

გარემოვაჭრეებმა პარლამენტს შესაბამისი წერილიც გაუგზავნეს. მათ გამგზავრებამდე ფეხით მსვლელობა მოაწყვეს.

ზუგდიდში დარჩენილი გარემოვაჭრეები აქციას მართავენ გუბერნატორის ადმინისტრაციასთან.

გარემოვაჭრეებმა აქციები 31 იანვარს დაიწყეს მას შემდეგ, რაც 30 იანვარს, გვიან ღამით, ზუგდიდიდს მერიის ზედამხედველობის სამსახურმა გარემოვაჭრეთა დახლები აიღო.

მერიამ მათ ალტერნატიული ფართები შესთავაზა, თუმცა გარემოვაჭრეები ცენტრალური ბაზრის შიგნით შესვლაზე უარს ამბობენ. გარემოვაჭრეების თქმით, მათ აქვთ მცირებიუჯეტიანი საქონელი და ადგილის თანხას ვერ გადაიხდიან, თუმცა თანახმა არიან, მდინარე ჩხოუშის სანაპიროს ტერიტორიაზე გადავიდნენ იმ შემთხვევაში, თუ იქ იქნება შესაბამისი პირობები. შესაბამისი სავაჭრო ფართების აშენებამდე ისინი ითხოვენ გარევაჭრობის გაგრძელებას, რაზეც მერია უარს აცხადებს.