ეკონომიკა

2018 წლის II კვარტალში საქართველოს ყველაზე მსხვილი ინვესტორი აზერბაიჯანი იყო - საქსტატი

სტატისტიკის ეროვნული სამსახურის წინასწარი მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2018 წლის II კვარტალში 389.2 მლნ. აშშ დოლარი შეადგინა, რაც 2017 წლის II კვარტალის დაზუსტებულ მონაცემებს 9.4 %-ით აღემატება. აქვე აღსანიშნავია, რომ საწარმოებიდან მიღებული განახლებული მონაცემების საფუძველზე საქსტატმა დააზუსტა 2017 წლის (რომლის შედეგადაც გამოქვეყნებული მაჩვენებელი გაიზარდა 0.3 %-ით) და 2018 წლის I კვარტალის (მაჩვენებელი შემცირდა 0.1 %-ით) მონაცემები.

2018 წლის II კვარტალში საქართველოს უმსხვილეს პირდაპირ ინვესტორებს შორის პირველი ადგილი დაიკავა აზერბაიჯანმა - 20.7 %-ით, მეორე ადგილზეა ჩეხეთი - 20 %-ით, ხოლო მესამეზე ნიდერლანდი - 16.8 %-ით

2018 წლის II კვარტალის მიხედვით, ყველაზე მეტი პირდაპირი უცხოური ინვესტიცია ენერგეტიკის სექტორში განხორციელდა და 108.8 მლნ. აშშ დოლარს მიაღწია, რაც მთლიანი პირდაპირი უცხოური ინვესტიციების 28 %-ია. მეორე ადგილზე იმყოფება ტრანსპორტისა და კავშირგაბმულობის სექტორი 77.0 მლნ. აშშ დოლარით, ხოლო მესამეზე - საფინანსო სექტორი 64.1 მლნ. აშშ დოლარით. სამი უმსხვილესი სექტორის წილმა (განხორციელებული პირდაპირი უცხოური ინვესტიციების მიხედვით) 2018 წლის II კვარტალში 64.2 % შეადგინა.

ყველაზე მცირე რაოდენობის უცხოური ინვესტიცია სოფლის მეურნეობასა (6,9 მილიონი დოლარი) და ჯანმრთელობის დაცვის სექტორში (1,6 მილიონი დოლარი) შემოვიდა.