უკან

უახლესი ამბები

დღის კალენდარი

ანონსები

არქივი

ეკონომიკა

25 აგვისტო, 2018 14:02
font-size

ადგილობრივი მწარმოებლები ხელისუფლებას დამპინგური პროცესების შესაჩერებლად აქტიური პოლიტიკის გატარებისკენ მოუწოდებენ

საქართველოში დამპინგური სავაჭრო გარემო ათასობით სამუშაო ადგილს გაქრობის საფრთხის წინაშე აყენებს. თამბაქოს, კვერცხის, თაფლის და ჩაის მწარმოებლების შემდეგ, ქვეყანაში არაკონკურენტული ბიზნეს გარემოს შესახებ უკვე ფოლადისა და ცემენტის მწარმოებლები ალაპარაკდნენ.

რუსთავის მეტალურგიული ქარხანა და ჰაიდელბერგ ცემენტი საქართველოს ხელისუფლებას დამპინგური პროცესების შესაჩერებლად აქტიური პოლიტიკის გატარებისკენ მოუწოდებენ.

ამ ფონზე, მთავრობა საკანონმდებლო ბაზის დახვეწის აუცილებლობაზე ისევ საუბრობს, თუმცა მეწარმეების თქმით, ჯერჯერობით, ერთი პოზიტიური ნაბიჯიც არ არის გადადგმული.

რუსთავის მეტალურგიულ ქარხანაში აცხადებენ, რომ თვითღირებულებაზე დაბალ ფასად იმპორტირებული პროდუქცია ქართულ ნაწარმს რეალიზაციის სერიოზულ პრობლემებს უქმნის. მათი პროგნოზით, თუ ასე გაგრძელდა, ქარხანას შესაძლოა, რამდენიმე კვირაში 300-მდე მეტალურგის გათავისუფლება მოუწიოს.

"მომგებიანობამ დაიკლო 25%-ით იმის გამო, რომ არის ბაზარზე დამპინგი და ამან შეაჩერა 25 მილიონიანი განვითარების პროექტი", - აცხადებს რუსთავის მეტალურგიული ქარხნის გენერალური დირექტორი ნუგზარ კაჩუხაშვილი.

ჯართის შემგროვებლებიდან დაწყებული ქარხნის მუშებით დასრულებული, ქართული რკინის წარმოებაზე ფინანსურად დაახლოებით 10 ათასი ადამიანია დაკავშირებული.

"მეტალურგიის ინდუსტრიაში დასაქმებულია დაახლოებით 10 ათასამდე ადამიანი პირდაპირ თუ არაპირდაპირ. ეს ყველაფერი შესაძლოა, საფრთხის წინაშე დადგეს" , - ამბობს კაჩუხაშვილი.

არაკონკურენტული სავაჭრო გარემოს შესახებ და სამუშაოს ეტაპობრივი შეჩერების საფრთხეზე საუბრობს "ჰაიდელბერგ ცემენტის" ქართული წარმომადგენლობაც. კომპანიამ ამის შესახებ ოფიციალური განცხადებაც გაავრცელა და ხელისუფლებას დახმარებისკენ მოუწოდა.

„ბოლო ორი წლის განმავლობაში, საქართველოს ცემენტის ინდუსტრია საკმაოდ დიდ ზეწოლას განიცდის მეზობელი ქვეყნებიდან, რომლებიც ეკონომიკური სირთულეების გამო იძულებულები არიან აქტიურად ეძებონ დამატებითი საექსპორტო ბაზრები ჭარბი წარმოების სარეალიზაციოდ.

ირანული ცემენტის მწარმოებლების მიერ კლინკერსა და ცემენტზე დაწესებულმა დამპინგურმა ფასებმა საგრძნობლად შეამცირა პროდუქციის ფასები საქართველოში. ასეთ პირობებში კონკურენციის გაწევა შეუძლებელი ხდება, რადგან აღნიშნული ფასები წარმოების თვითღირებულებაზე ბევრად დაბალია“, - აცხადებენ კომპანიაში.

დიდი ხანია, დამპინგზე საუბრობენ თამბაქოს მწარმოებლებიც. მათი თქმით, ქვეყანაში ეროვნულ წარმოებას არავინ იცავს, რის გამოც, შესაძლოა, ათასობით ადამიანი ამ სექტორშიც უმუშევარი დარჩეს.

პრობლემები აქვთ კვერცხის, ყველის, მეფრინველეობისა და თითქმის ყველა ადგილობრივ წარმოებაში.

რამდენიმე თვის წინ სწორედ მიზანმიმართული ფასის შემცირება გახდა აგარის შაქრის ქარხნის გაჩერებისა და ასობით ადამიანის უმუშევრად დატოვების მიზეზი.

დამპინგური გარემო რომ ქვეყანაში უმუშევრობის ზრდას ხელს უწყობს და ეკონომიკას აზარალებს, ამის შესახებ დეპუტატმა, პარლამენტის ფრაქცია ,,საქართველოს პატრიოტების“ წევრმა, ნატო ჩხეიძემ პრემიერ მამუკა ბახტაძეს საპარლამენტო ტრიბუნიდანაც შეახსენა.

"რთული მდგომარეობის ერთ-ერთი, ცხადია და არა ერთადერთი, მიზეზი არის ჩვენ ქვეყანაში თქვენი წინამორბედების მიერ საკმაოდ წაქეზებული დამპინგი.

მოგეხსენებათ, რომ ევროპაში დამპინგი არის აკრძალული და ჩვენ, როდესაც მივისწრაფით ევროპისაკენ და მთელი რიგი კანონების ჰარმონიზაციას ვახდენთ, ალბათ ამ მიმართულებითაც უნდა იმუშავოს ჩვენმა მთავრობამ" , - განაცხადა ნატო ჩხეიძემ.

მაშინ ბახტაძემ პრობლემის შესწავლისა და გადაჭრის პირობა დადო.

"დიახ, აქ ჩვენ აქ ვიქნებით ძალიან პრინციპულები და მაქსიმალურად მხარს დავუჭერთ ქართულ კომპანიებს, რომ არ დაიჩაგრონ არასწორი თამაშის წესების გამო. მზად ვარ, ნებისმიერი კომპანიის შემთხვევა ცალ-ცალკე განვიხილო, არათუ მხოლოდ გარკვეული სექტორების", - აღნიშნა პრემიერმა დეპუტატ ნატო ჩხეიძის პასუხად.

მთავრობის მეთაურის დაპირებიდან 2 თვე გავიდა, თუმცა დღეს პრობლემა კვლავ რჩება და ათასობით ადამიანს უმუშევრობის საფრთხე ემუქრება.

თავის მხრივ, მმართველ გუნდში აცხადებენ, რომ ანტიდამპინგური კანონი აუცილებლად მისაღებია.

"მიდგომაა - პატიოსანი თამაში წესები ყველასთვის და ეს თამაშის წესები ასევე უნდა დაემყაროს იმას, რომ იწარმოებოდეს ხარისხიანი პროდუქცია. აქ არის საუბარი იმაზე, რომ ანტიდამპინგური კანონმდებლობა ეფექტიანად უნდა ამუშავდეს", - აცხადებს პარლამენტის ჯანდაცვის კომიტეტის თავმჯდომარე, აკაკი ზოიძე.

მთავრობა პრობლემის აღმოფხვრის პირობას დებს, თუმცა ჯერჯერობით დამპინგი ადგილობრიბი ბიზნესისთვის კვლავ მთავარ გამოწვევად რჩება.

ფოლადი, ცემენტი, თამბაქო, კვერცხი, შაქარი და ხორცი - ეს იმ პროდუქციის მოკლე ჩამონათვალია, რომლის ქართულ წარმოებასაც ადგილობრივ ბაზარზე საფრთხე, ამ სექტორებში დასაქმებულებს კი სამსახურის დაკარგვის საშიშროება ემუქრებათ.

200 ათას ლარამდე სესხის აღება მხოლოდ ეროვნულ ვალუტაშია შესაძლებელი

23 იანვარი, 2019 , 17:42

დღეიდან 200 ათას ლარამდე ოდენობის სესხის აღება მხოლოდ ეროვნულ ვალუტაში იქნება შესაძლებელი. საქართველოს სამოქალაქო კოდექსით გათვალისწინებული ახალი ზღვარი ძალაში დღეიდან შევიდა. “თუ საქართველოს კანონმდებლობით სხვა რა

ეროვნულმა ბანკმა ლარის ახალი კურსი დაადგინა

23 იანვარი, 2019 , 17:34

საქართველოს ეროვნული ბანკის მიერ 24 იანვრისთვის დადგენილი კურსით, ერთი ამერიკული დოლარის ოფიციალური ღირებულება 2.6599 ლარია. აქამდე მოქმედი კურსით ლარი 2.6611 ღირდა. შესაბამისად, ლარის კურსი დოლართან მიმართებით 0.0012-ით

ეროვნულმა ბანკმა 15 000 000 აშშ დოლარი შეისყიდა

23 იანვარი, 2019 , 16:36

დღეს გამართულ საქართველოს ეროვნული ბანკის სავალუტო აუქციონზე სებ-მა 15 000 000 აშშ დოლარი შეისყიდა. საშუალო შეწონილმა გაცვლითმა კურსმა 2.6601 შეადგინა.

თავისუფალი ეკონომიკის განვითარების მხრივ საერთაშორისო ორგანიზაციებისგან კარგი შეფასებები გვაქვს - დავით ზალკალიანი

23 იანვარი, 2019 , 14:54

საქართველოს თავისუფალი ეკონომიკის განვითარების თვალსაზრისით, ასევე სავაჭრო და სატრანსპორტო პოტენციალის შესაძლებლობის კუთხით ყველა საერთაშორისო ორგანიზაციის მხრიდან კარგი შეფასებები აქვს, – ამის შესახებ საგარეო საქმ

ეროვნულმა ბანკმა ლარის ახალი კურსი დაადგინა

23 იანვარი, 2019 , 09:00

საქართველოს ეროვნული ბანკის მიერ 23 იანვრისთვის დადგენილი კურსით, ერთი ამერიკული დოლარის ოფიციალური ღირებულება 2.6611 ლარია. აქამდე მოქმედი კურსით ლარი 2.6613 ღირდა. შესაბამისად, ლარის კურსი დოლართან მიმართებით 0.0002-ით

კომპანია Stena Rederi საქართველოდან ევროპისა და აზიის ქვეყნების მიმართულებით საზღვაო გადაზიდვების ორგანიზებით დაინტერესდა

22 იანვარი, 2019 , 18:27

საზღვაო გადაზიდვების სფეროში ერთ-ერთი უმსხვილესი კომპანია Stena Rederi საქართველოდან ევროპისა და აზიის ქვეყნების მიმართულებით საზღვაო გადაზიდვების ორგანიზებით დაინტერესდა, - ამის შესახებ საქართველოს&n

ვიდეო გალერეა

შეტევა ტელეკომპანია `იბერიასა` და `ომეგა ჯგუფზე`