რეგიონები

ამ შაბათ-კვირას ანაკლიაში 20 ათასზე მეტი ადამიანი ჩამოვიდა, შესაბამისად, რისკი და ალბათობა იმისა, რომ ვიღაც ცუდად გახდება, მაღალია - გიორგი სიგუა

ახლა არის ფესტივალის პიკი და პრაქტიკულად ყველაზე მეტი ადამიანი ამ დროს ჩამოდის. ამ შაბათ-კვირას ანაკლიაში 20 ათასზე მეტი ადამიანი ჩამოვიდა, შესაბამისად, რისკი და ალბათობა იმისა, რომ ვიღაც ცუდად გახდება, მაღალია. ელემენტარულად, სიცხისგან ხდებიან ცუდად, - განაცხადა მუსიკალური ფესტივალი GEM FEST-ის დამფუძნებელმა, გიორგი სიგუამ ფესტივალის მონაწილე 22 წლის გოგონას გარდაცვალების ფაქტის კომენტირებისას.

სიგუას თქმით, ფესტივალის პირველივე დღიდან შსს-ს წარმომადგენლები აქტიურად აკონტროლებენ სიტუაციას.

„პირველივე დღიდანვე შსს-ს წარმომადგენლები მაღალ დონეზე აკონტროლებენ და ფლობენ სიტუაციას დანაშაულთან ბრძოლასთან დაკავშირებით. წინ არის ფესტივალის ხალხმრავალი დღეები. კარგად მუშაობენ შსს-ს წევრები, კარგად მუშაობენ ამბულატორიები. სამი უმაღლესი სტანდარტების აღჭურვილი მედპუნქტი გვაქვს“, - აღნიშნა სიგუამ.

მან გუშინ ზუგდიდის რეფერალურ ჰოპიტალში გარდაცვლილი ახალგაზრდა ქალის ოჯახს მიუსამძიმრა.

„ვუსამძიმრებ გარდაცვლილის ოჯახს, ძალიან შემზარა ამ ფაქტმა, მთელი „ჯემფესტის“ გუნდი არის თავზარდაცემული. არ არის ჯერ დადგენილი, რასთან გვქონდა საქმე. ზუგდიდის საავადმყოფოში კიდევ რამდენიმე ადამიანი იქნა გადაყვანილი, მაგრამ მათ ჯანმრთელობას საფრთხე არ ემუქრება. თუმცა რა მოხდა, ამას გამოძიება დაადგენს“, - განაცხადა სიგუამ.

ნინო ექვთიმიშვილი