ეკონომიკა

აქციზის გადასახადი იმპორტულ ავტომობილებზე გაიზრდება - გიორგი კვირიკაშვილი

საქართველოს პრემიერ-მინისტრის განცხადებით, მომავალი წლიდან აქციზის გადასახადი იმპორტულ ავტომობილებზე გაიზრდება, „თუმცა ის რეგიონში არსებულ განაკვეთებზე რამდენჯერმე დაბალი იქნება“.

როგორც გიორგი კვირიკაშვილმა მთავრობის სხდომაზე აღნიშნა, აქციზის გადასახადის მატება შეეხება ნავთობპროდუქტებსაც.

მთავრობის მეთაურმა აღნიშნა, რომ ნავთობროდუქტების მოხმარება ავტომობილების რაოდენობის ზრდასთან ერთად მატულობს, რაც უარყოფითად აისახება ეკოლოგიურ მდგომარეობაზე, მიღებული გადაწყვეტილებები კი ხელს შეუწყობს ავტოპარკის თანამედროვე სტანდარტებით განახლებას და ჩვენი მოსახლეობის ჯანმრთელობის რისკების შემცირებას.

„ნავთობროდუქტების მოხმარება ავტომობილების რაოდენობის ზრდასთან ერთად მატულობს, რაც უარყოფითად აისახება ეკოლოგიურ მდგომარეობაზე. ართულებს დიდ ქალაქებში თავისუფლად გადაადგილების შესაძლებლობას, ამძიმებს მოსახლეობის, განსაკუთრებით კი ბავშვების ჯანმრთელობის მდგომარეობას. მიღებული გადაწყვეტილებები ხელს შეუწყობს ავტოპარკის თანამედროვე სტანდარტებით განახლებას და ჩვენი მოსახლეობის ჯანმრთელობის რისკების შემცირებას. ამ მხრივ საქართველოშიც მნიშვნელოვანი ნაბიჯები გადაიდგა. ჯერ განახევრდა, ახლა კი 60 პროცენტით მცირდება აქციზის გადასახადი ჰიბრიდული ავტომობილების იმპორტზე. ელექტრო მანქანების იმპორტი კი საერთოდ არ იბეგრება. ამასთან, საქართველოში წლიდან წლამდე შემცირების ნაცვლად იზრდება ავტომობილების რაოდენობა და შესაბისად ნავთობპროდუქტების მოხმარება და იმპორტი“- განაცხადა მთავრობის მეთაურმა.

მონიკა დავლიანიძე