უახლესი ამბები
- 26.04.2024 18:36ჩვენი გზა უნდა მიდიოდეს ევროპაში ორივესი ერთად, მაგრამ რუსეთისკენ მიდიხართ, რუსეთში მიგვათრევთ - ლილე ლიპარტელიანი `ოცნებას`
- 26.04.2024 18:19ლექტორის მკვლელობის ფაქტზე სასამართლომ ორ პირს 20-20 წლით თავისუფლების აღკვეთა შეუფარდა
- 26.04.2024 18:1015 პარტნიორი უნივერსიტეტი, 140-მდე სტიპენდიატი - საქართველოს ბანკის სასტიპენდიო პროგრამის გამარჯვებულები ცნობილია
- 26.04.2024 17:3328 აპრილს თითოეული ქართველის ადგილი რუსთაველზეა - ლევან ხაბეიშვილი
- 26.04.2024 15:32მინდა ვთხოვო და მოვუწოდო ყველა მასწავლებელს - უთხრან არა საქართველოს რუსიფიკაციას და ევროკავშირისგან დაშორებას - ნანა ტოხვაძე
- 26.04.2024 15:1930 წელი მივდიოდით ერთი მიმართულებით და ახლა აღმოჩნდა, რომ უნდა წავიდეთ სხვა მხარეს, რაც, ჩემი აზრით, არ წაადგება ჩვენი ქვეყნის პერსპექტივებს - თედო ჯაფარიძე
არქივი
რეგიონები
„აზოტის“ ადმინისტრაცია მუშებს აიძულებს სამსახურიდან საკუთარი სურვილით გათავისუფლების შესახებ განცხადებებს ხელი მოაწერინონ - პროფკავშირები
საქართველოს პროფესიული კავშირების გაერთიანება და საქართველოს მეტალურგიული, სამთო და ქიმიური მრეწველობის მუშაკთა პროფესიული კავშირი ერთობლივ პრესკონფერენციაზე გამოეხმაურნენ სს „რუსთავის აზოტში“ განხორციელებულ მასობრივ გათავისუფლებას.
ერთობლივ განცხადებაში ნათქვამია, რომ ადმინისტრაცია მუშებს აიძულებს, სამსახურიდან საკუთარი ნებით წასვლის შესახებ განცხადებები დაწერონ.
„მედიანიუსი“ პროფკავშირების განცხადებას უცვლელად გთავაზობთ:
„რუსთავის აზოტის ირგვლივ მიმდინარე ,,უცნაური“ პროცესების შესახებ, საქართველოს პროფესიული კავშირების გაერთიანება და საქართველოს მეტალურგიული, სამთო და ქიმიური მრეწველობის მუშაკთა პროფესიული კავშირი, ჯერ კიდევ 2016 წლის დასაწყისიდან საუბრობდა და ითხოვდა განმარტებებს და ინფორმაციების გასაჯაროებას.
2016 წლის დასაწყისიდან, კომპანია „სოკარის“ მიერ ბუნებრივ აირზე, თითქოსდა, რუსთავის აზოტისთვის არაადექვატური ფასის დაწესების გამო, საწარმო შეფერხებებით მუშაობდა. პარალელურად, საქართველოს მთავრობა კომპანიის ადმინისტრაცია აანონსებდა ევროპის რეკონსტრუქციისა და განვითარების ბანკთან (EBRD) წარმატებით დასრულებულ მოლაპარაკებას რუსთავის აზოტის ას მილიონ ლარზე მეტით დაფინანსებასთან დაკავშირებით. ყოველივე ამის შემდეგ, 2016 წლის ივლისის თვეში, ბუნებრივი აირის ფასთან დაკავშირებული პრობლემების გამო, საწარმო კვლავ გაჩერდა, ამის პარალელურად კი საინფორმაციო სააგენტოების ვებ-გვერდებზე გავრცელდა ინფორმაცია, რომ კომპანიამ გაასხვისა საწარმოს შენობა ნაგებობების და სხვა ძირითადი საშუალებების ნაწილი, ეს ფაქტი კომპანიამ უარყო და დეზინფორმაციად შეაფასა.
იმას რომ არ საჯაროვდებოდა ინფორმაციები, პროფკავშირმა 2016 წლის 15 სექტემბერს ორგანიზება გაუკეთა საპროტესტო აქციას მოთხოვნით: ,,გასაჯაროვდეს ინფორმაციები აზოტთან დაკავშირებით“, რის შემდეგაც ქარხნის მფლობელმა, რომან ფიფიამ ჩაატარა კონტრაქცია და ხალხს უთხრა რომ პროფაკვშირებს პოლიტიკური ინტერესი გააჩნიათ და იმიტომ არიან დაკავებული პოპულიზმით, სინამდვილეში კი ყველაფერი კარგად არის, ეგ კი არა და მომავალ წელს ხელფასების ოდენობის გაორმაგებას ვაპირებო.
2016 წლის 30 იანვარს საწარმო გაჩერდა, ისევ გაჟღერებული ბუნებრივი აირის ფასის პრობლემით, თუმცა ამავე დროს შეიცვალა მენეჯმენტი და პროცესების მართვა დაიწყეს საქართველოს ბანკის წარმომადგენლებმა.
2017 წლის 20 იანვრიდან კომპანიამ დაიწყო დასაქმებულთა შემცირებაზე საუბარი. 25 იანვრიდან კი პროცესები მიმდინარეობს სრული კანონდარღვევით, კომპანია აიძულებს ადამიანებს, მოაწერონ ხელი სამუშაოდან საკუთარი სურვილით წასვლის განცხადებებს, მერე კი თავად გადაწყვეტს , ვის გაუფორმოს ახალი კონტრაქტი, რომელიც ასევე საკმაოდ ბევრ კაბალურ პუნქტს შეიცავს. კომპანია აპირებს სამსახურიდან გაანთავისუფლოს 350-მდე დასაქმებული.
საქართველოს პროფესიული კავშირების გაერთიანება და დარგობრივი პროფკავშირი, ყველა შესაძლო მეთოდით დაიცავს რუსთავის „აზოტის“ დასაქმებულთა უფლებებსა და ინტერესებს“, - ნათქვამია განცხადებაში.
შეგახსენებთ, რომ დღეს რუსთავის აზოტის საწარმოს მიმდებარე ტერიტორიაზე შეკრებილმა მუშებმა მათი გათავისუფლება გააპროტესტეს.
აქციის მონაწილეების თქმით, ცნობა სამსახურიდან დათხოვნის შესახებ მათ დილის ცვლის დაწყების წინ გაიგეს. მუშები ამბობენ, რომ კომპანიას არ აუხსნია მასობრივი გათავისუფლების მიზეზი.
როგორც „მედიანიუსს“ „აზოტის“ პრესსამსახურის წარმომადგენელმა, ზვიად კეჭაყმაძემ განუცხადა, ამჟამად კომპანიაში რეორგანიზაციის პროცესი მიმდინარეობს, რადგან საწარმოს მფლობელი შეეცვალა. კომპანია შპს-დან სააქციო საზოგადოება „რუსთავის აზოტად“ გადაიქცა.
კეჭაყმაძე ამბობს, რომ კომპანია თანამშრომელთა ხელახალ მიღებასა და მათთან ხელშეკრულების დადებას აპირებს. დააბრუნებენ თუ არა გათავისუფლებულ მუშებს სამსახურში, ჯერჯერობით უცნობია.
ანა მებურიშვილი