რეგიონები

ხელვაჩაურში მოსახლეობას და პოლიციას შორის დაპირისპირება მოხდა

ხელვაჩაურში აქციის მონაწილეებსა და სამართალდამცველებს შორის ხმაური და დაპირისპირება მოხდა.

ხიხანის ქუჩის მცხოვრებლები ბათუმი-ახალციხის მიმართულებით მაღალი ძაბვის ელექტროგადამცემი სისტემის სამონტაჟო სამუშაოებს აპროტესტებენ.

მოსახლეობის განცხადებით, ხელისუფლება მათ კერძო საკუთრებაშია შეჭრილი და მიწის ღირებულებაზე ნაკლებ თანხას სთავაზობს.

დაბა ხელვაჩაურის მაცხოვრებლებმა სამუშაობის შეჩერების მიზნით გზის გადაკეტვა სცადეს, თუმცა მათ ამის საშუალება პოლიციამ არ მისცა.

მოსახლეობა გაჩერებას არ აპირებს და რეალური კომპენსაციის მოთხოვნის მიზნით კვლავ აქციებით იმუქრება.

ხელვაჩაურის ხიხანის ქუჩის მოსახლეობა კვადრატულ მეტრ მიწის ფართობში 35 დოლარს ითხოვს. როგორც ისინი ამბობენ, მიწის ნაკვეთები სამხარეულის ექსპერტიზის ბიურომ ასე შეაფასა. სახელმწიფო კი მათ 7-დან 20-ლარამდე თანხას უხდის.