ეკონომიკა

ყველა გამსესხებელს აეკრძალება მომხმარებლისგან დაგირავებული ნივთის გარდა, სხვა ქონება მოითხოვოს - მამუკა ბახტაძე

საქართველოს ფინანსთა მინისტრის, მამუკა ბახტაძის ინფორმაციით, მთავრობის დღევანდელ სხდომაზე ჭარბვალიანობის შემცირებასთან დაკავშირებით წარმოდგენილი საკანონმდებლო ცვლილებათა პაკეტი 5 პრინციპს ეფუძნება. მაგალითად, ორჯერ შემცირდება ეფექტური საპროცენტო განაკვეთის მაქსიმალური ზღვარი.

„საქართველოს მოსახლეობას შევპირდით, რომ საბანკო-საფინანსო სექტორში დავამკვიდრებდით ახალ, სამართლიანი თამაშის წესებს. დღეს წარმოგიდგენთ ძირითად ხუთ პრინციპს, რომელსაც ეფუძნება ჩვენი ინიციატივა:

ყველა გამსესხებელს აეკრძალება მომხმარებლისგან დაგირავებული ნივთის გარდა, სხვა ქონება მოითხოვოს;

ლომბარდებსა და კერძო გამსესხებლებს – ე.წ. მევახშეებს ეკრძალებათ ავტომობილებისა და უძრავი ქონების დაგირავება;

ეფექტური საპროცენტო განაკვეთის მაქსიმალური ზღვარი დაწესდება 50 პროცენტის ოდენობით, რომელიც ორჯერ ნაკლებია ვიდრე დღეს არსებული 100 პროცენტი“, – თქვა ბახტაძემ მთავრობის სხდომის დასრულების შემდეგ.

ბახტაძემ აღნიშნა, რომ მეოთხე პრინციპის თანახმად, „დღეს არსებული უპასუხისმგებლო და არასამართლიანი ჯარიმების დარიცხვის სისტემა“ გაუქმდება და ყველა გამსესხებელს აეკრძალება ჯარიმა დათვალოს კრედიტის საერთო მოცულობიდან.

მინისტრმა ხაზი გაუსვა, რომ „აღნიშნული თამაშის წესები გავრცელდება ყველაზე, მთელ ფინანსურ სექტორზე. აქ იგულისხმებიან ბანკები, მიკროსაფინანსო ორგანიზაციები, ლომბარდები თუ კერძო გამსესხებლები, ყველა ვინც არის დაკავებული ფინანსური საქმიანობით“.

მისი შეფასებით, აღნიშნული ინიციატივა ითვალისწინებს მაქსიმალური გამჭვირვალობის შეტანას საფინანსო სექტორში.

ბახტაძემ განაცხადა, რომ ლომბარდებს მიეცემათ გონივრული ვადა, რომ საქმიანობა დახვეწონ, განავითარონ და შექმნან ერთიანი პროგრამული უზრუნველყოფა, სადაც აღრიცხული იქნება ყველა დაგირავებული ნივთი, რათა მისივე თქმით, გამოირიცხოს კრიმინალური მომენტების ალბათობა.

ბახტაძე აღნიშნულ ინიციატივასთან დაკავშირებით 29 მაისს პრეზენტაციას გეგმავს, სადაც ჩამოთვლილ პრინციპებზე დეტალურად ისაუბრებს.