ეკონომიკა

პირდაპირი უცხოური ინვესტიციები წინა წლის ანალოგიურ პერიოდთან შედარებით 17.6%-ით გაიზარდა - საქსტატის წინასწარი მონაცემები

საქართველოში განხორციელებული პირდაპირი უცხოური ინვესტიციების მოცულობამ 2017 წლის III კვარტალში 594.5 მლნ. აშშ დოლარი შეადგინა, რაც წინა დღის ანალოგიური პერიოდის მაჩვენებელზე 17.6%-ით მეტია. წინასწარ მონაცემებს საქართველოს სტატისტიკის ეროვნული სამსახური აქვეყნებს.

მიმდინარე წლის I-III კვარტალში განხორციელებულმა პირდაპირმა უცხოურმა ინვესტიციებმა ჯამურად 1 346.5 მლნ. აშშ დოლარი შეადგინა, რაც წინა წლის შესაბამისი პერიოდის მაჩვენებელზე 2.9%-ით მეტია.

2017 წლის III კვარტალში უმსხვილესი პირდაპირი ინვესტორი ქვეყანა აზერბაიჯანი გახდა 25.9%-ით, მეორე ადგილზე გავიდა თურქეთი 23.3 %-ით, ხოლო მესამეზეა გაერთიანებული სამეფო 10.7%-ით.

სამი უმსხვილესი სექტორის წილმა (განხორციელებული პირდაპირი უცხოური ინვესტიციების მიხედვით) 2017 წლის III კვარტალში 61.6 % შეადგინა. ყველაზე მეტი პირდაპირი უცხოური ინვესტიცია ტრანსპორტისა და კავშირგაბმულობის სექტორში განხორციელდა და 177.8 მლნ. აშშ დოლარს მიაღწია, რაც მთლიანი პირდაპირი უცხოური ინვესტიციების 29.9 %-ია. მეორე ადგილზე იმყოფება მშენებლობის სექტორი 116.2 მლნ. აშშ დოლარით (19.5%), ხოლო მესამეზე - ენერგეტიკის სექტორი 72.3 მლნ. აშშ დოლარით (12.2%-ით).