ეკონომიკა

საქართველოს ბანკის მხარდაჭერით ტურიზმის ეროვნული დაჯილდოების რიგით მეოთხე ღონისძიება გაიმართება

საქართველოს ბანკის თანაორგანიზებით 17 დეკემბერს ტურიზმის ეროვნული დაჯილდოების რიგით მეოთხე ღონისძიება რუსთაველის თეატრში გაიმართება.

აღნიშნულთან დაკავშირებით დღეს საქართველოს ბანკის სათაო ოფისში პრესკონფერენცია გაიმართა.

როგორც ჟურნალისტებთან შეხვედრაზე აღინიშნა, დაჯილდოების ცერემონიაზე 20 განსახვავებულ ნომინაციაში ტურიზმის და მასპინძლობის დარგის 350-ზე მეტი წარმომადგენლიდან გამოვლინდებიან გამარჯვებულები. საქართველოს ბანკი ორი წლის განმავლობაში პროექტის ოფიციალური მხარდამჭერი და თანაორგანიზატორია. პარტნიორობის ფარგლებში საქართველოს ბანკი ორი წელია აჯილდოვებს საუკეთესო ქალ მეწარმეს ტურიზმის ინდუსტრიაში, ასევე წლის ყველაზე სწრფად მზარდ კომპანიას მცირე და საშუალო ბიზნესის მიმართულებით, წელს კი, საქართველოს ბანკმა დააწესა სპეციალური ნომინაცია ,,#მევქმნი - ყველაზე წარმატებულ ქართულ ბიზნესს ტურიზმის ინდუსტრიაში“ და ამ ნომინაციებში გამარჯვებულებს ბანკი განსაკუთრებულ საჩუქარს გადასცემს.

,,ჩვენ გვაქვს სიახლეები ნომინაციების კუთხით; გვყავს ბევრი ახალი მონაწილე, თვითონ დაჯილდოების პროგრამაც იქნება შეცვლილი და იქნება სიურპრიზები. ასე რომ, იმედი მაქვს, ძალიან საინტერესოდ ჩატარდება 17 დეკემბერს დაჯილდოების ცერემონია“, - განუცხადა ჟურნალისტებს საქართველოს ბანკის საცალო ბიზნესის საბანკო მომსახურების დეპარტამენტის დირექტორმა ზურაბ მასურაშვილმა.

საქართველოს ბანკის ინფორმაციით, თითოეული ნომინანტი საერთაშორისოდ აღიარებული მეთოდოლოგიის მიხედვით შეაფასა დამოუკიდებელმა ჟიურიმ, რომელიც საერთაშორისო და ადგილობრივი ტურიზმისა და მასპინძლობის სფეროს პროფესიონალებისგან შედგებოდა. პროექტის გამჭვირვალობისა მიუკერძოებლობის გარანტად უკვე მეოთხე წელია ჟიურის შეფასებას ინდივიდუალურად ყველა ნომინატისათვის ითვლის და აჯამებს პროექტის დამოუკიდებელი აუდიტორი ,,ბიდიო საქართველო“ და ავლენს ფინალისტებს და გამარჯვებულებს თითოეულ ნომინაციაში.

ცერემონია უკვე მეოთხე წელია იმართება საქართველოს ეკონომიკისა და მდგრადი განვითარების სამინისტროს ტურიზმის ეროვნული ადმინისტრაციის თანაორგანიზებით. ღონისძიების ოფიციალური მხარდამჭერები არიან: თბილისის მერია და საპარტნიორო ფონდი. დაჯილდოების დამოუკიდებელი აუდიტორი - ბიდიო საქართველო!

დაჯილდოების ცერემონიას დაესწრება 800-მდე სტუმარი: პროექტის ნომინანტები და პარტნიორები, სახელმწიფოს და ბიზნეს სექტორის წარმომადგენლები, საერთაშორისო და ადგილობრივი მედია.