ეკონომიკა

საქართველოს ეროვნული ვალუტა აგვისტოს დასაწყისამდე მსოფლიოში საუკეთესო მოთამაშე იყო, თუმცა თურქეთში ბაზრებზე პანიკამ შეარყია - ბლუმბერგი

„როდესაც საქართველო რუსეთთან ომის ათი წლისთავს აღნიშნავს, მისი ვალუტა სამხრეთელი მეზობლის დარტყმის ქვეშ აღმოჩნდა“, – ამის შესახებ საუბარია სააგენტო „ბლუმბერგის“ სტატიაში.

სტატიის ავტორი წერს, რომ 2018 წლის აგვისტოს დასაწყისამდე ქართული ეროვნული ვალუტა - ლარი მსოფლიოში საუკეთესო მოთამაშე იყო, თუმცა თურქეთში ბაზრებზე პანიკამ ქართული ლარი შეარყია.

„რამდენიმე დღეში ლარი თურქეთის სავალუტო კრიზისმა ჩაითრია, ვინაიდან ინვესტორები მიიჩნევენ, რომ ყოფილ საბჭოთა ქვეყანას უმსხვილეს სავაჭრო პარტნიორთან კონკურენტუნარიანობის შესანარჩუნებლად ადაპტირება დასჭირდება“, – წერია სტატიაში.

ავტორი ასევე წერს, რომ მხოლოდ ბოლო ერთი კვირის განმავლობაში ლარი დოლართან მიმართებაში ექვსი პროცენტით გაუფასურდა, ხოლო მდგომარეობას კიდევ უფრო ართულებს ის, რომ საქართველოს მეორე უმსხვილესი სავაჭრო პარტნიორი რუსეთია, რომელიც მიმდინარე თვეში თავად განიცდის ვალუტის დაცემას აშშ-ის მხრიდან ბოლო სანქციების ამოქმედებისა და ახალი სანქციების დაწესების მუქარის შემდეგ.

სტატიაში აღნიშნულია, რომ ლარის წარმატების უკუსვლა თურქული ლირის გვერდითა ეფექტის კიდევ ერთი მტკიცებულებაა. ლირის გაუფასურება უკვე აისახა ევროზონასა და ლათინური ამერიკის ბაზრებზე. რუსეთსა და თურქეთში არსებულმა სავალუტო კრიზისმა უკვე მოახდინა გავლენა ყოფილ საბჭოთა რესპუბლიკებზეც, მათ შორის ყაზახეთსა და აზერბაიჯანზე.