ეკონომიკა

საქართველოში კიდევ 2 ახალი საწარმო აშენდება - გიორგი კვირიკაშვილი

საქართველოს პრემიერ-მინისტრი გიორგი კვირიკაშვილი დღეს ჩატარებულ მთავარობის სხდომაზე განაცხადა, რომ პროგრამა „აწარმოე საქართველოში“ ფარგლებში კიდევ ორი საწარმო აშენდება. ერთ-ერთი მათგანი იქნება სამშენებლო მასალების მწარმოებელი ქარხანა, რომელიც დიდ ლილოშო ამოქმედდება და მასზე 3,5-მილიონიან ლარზე მეტი ინვესტიცია ჩაიდება. გარდა ამისა, მთავრობა საწარმოს სიმბოლურ ფასად 1 ჰექტარამდე მიწის ნაკვეთს გადასცემს. მეორე პროექტი არის მინისა და მინის ნაწარმის მწარმოებელი საწარმო, რომელშიც მილიონ ლარამდე ინვესტიცია განხორციელდება.

გიორგი კვირიკაშვილის თქმით, მთავრობა ქვეყანაში წარმოების გასავითარებლად რამდენიმე მიმართულებით მუშაობს.

„მთავრობა დამწყებ ბიზნესს ეხმარება რამდენიმე მიმართულებით: სახელმწიფოს ხელში არსებული ქონების უსასყიდლოდ გადაცემა, სესხის სუბსიდირება სტარტაპის, ანუ დაწყების პერიოდში 2 წლის განმავლობაში და კომერციულ ბანკებში მოთხოვნილი გირაოს ნახევრის უზრუნველყოფა,“ - განაცხადა პრემიერმა.

კვირიკაშვილმა ასევე თქვა, რომ პროგრამა „აწარმოე საქართველოში “ ფარგლებში ცნობილი ქართველი სამრეწველო დიზაინერი, ზვიად ციკოლია ახალი საწარმოს გახსნას გეგმავს. პრემიერის თქმით, მთავრობა ამ ინიციატივას მხარს უჭერს.

„მინდა მივესალმო იმ ინტერესს, რომელიც ბოლო დღეებში გამოთქვა მსოფლიოში ცნობილმა ქართველმა დიზაინერმა ზვიად ციკოლიამ, რომ ამ პროგრამის ფარგლებში შექმნას საწარმო საქართველოში. ჩვენ მზად ვართ, პროგრამის ფარგლებში, სრული თანადგომა გავუწიოთ ამ პროექტს, რათა მაქსიმალური სარგებელი მიიღოს ჩვენმა ქვეყანამ ჩვენი ნიჭიერი თანამოქალაქეებისგან, რომელებიც მსოფლიოს სხვადასხვა კუთხეში წარმატებით მოღვაწეობენ,“ - აღნიშნა პრემიერ-მინისტრმა.

ჯერჯერობით უცნობია, ციკოლიამ რა ბიზნეს-იდეა შესთავაზა მთავრობას. საზოგადოებრივ მაუწყებელთან დიზაინერმა თქვა, რომ ამ ეტაპზე საქართველოში განხორციელებულ გეგმაზე საუბრისას თავს შეიკავებს.
„ჯერ ვერაფერს გეტყვით, სანამ შეხვედრა არ შედგება და კონკრეტულ საკითხებზე არ მოხდება საუბარი“, - აცხადებს ზვიად ციკოლია.

ზვიად ციკოლია ცნობილი ქართველი სამრეწველო დიზაინერია, რომლის ნამუშევრები გამოქვეყნებულია: Carstyling, Auto&Design, Auto Bild, Auto review, Super cars, GQ, Le, Style, Really Good Packaging, Big Book of Packaging, Design and Design და სხვა ჟურნალებში.

ანა მებურიშვილი