რეგიონები

ზვარეში მუშების მხარდასაჭერად სტუდენტები ჩავიდნენ

რკინიგზელთა ახალი პროფკავშირის ინფორმაციით, ხარაგაულის რაიონის სოფელ ზვარეში, რკინიგზის მშენებლობაზე დასაქმებული მუშების მხარდასაჭერად 20-მდე სტუდენტი ჩავიდა. გაფიცულ მუშებს, სოლიდარობა გამოუცხადა სოფელ დიდ ვაკეს მოსახლეობამაც.

მესამე დღეა, ზვარეში ადგილობრივებისა და რკინიგზის მშენებლობაზე დასაქმებული მუშების აქცია მიმდინარეობს. აქციის მონაწილეები რამოდენიმე დღის წინ მომხდარი შემთხვევის დროულ გამოძიებას, ქართველი მუშების ცემაში მონაწილე ყველა ჩინელის დაკავებას და ჩინური კომპანიის მენეჯმენტის შეცვლას ითხოვენ.

რამოდენიმე დღის წინ, ჩინელ დამსაქმებელსა და ქართველ მუშებს შორის მომხდარი დაპირისპირების შედეგად 10-მდე მუშა დაშავდა. შინაგან საქმეთა სამინისტრომ ფაქტზე ჩინეთის სამი მოქალაქე დააკავა. ისინი სისხლის სამართლის კოდექსის 118-ე მუხლით დააკავეს, რაც ჯანმრთელობის განზრახ ნაკლებად მძიმე დაზიანებას გულისხმობს.

მარი ნამგალაძე